صنعا، یمن کے حوثیوں نے کہا ہے کہ “ہم بحیرہ احمر میں اسرائیلی بحری آمدو رفت پر مکمل اور بلا کم و کاست پابندی لگا دیں گے”۔

خطے میں بڑھتی ہوئی کشیدگی کے بعد یمن کے حوثیوں نے آج بروز پیر جاری کردہ بیان میں کہا ہے کہ وہ بحیرہ احمر میں اسرائیلی بحری آمد و رفت پر “مکمل اور جامع پابندی” نافذ کریں گے۔ گروپ نے خبردار کیا ہے کہ اسرائیل سے منسلک جہازوں کو دوبارہ نشانہ بنایا جائے گا۔

حوثیوں نے یافا میں حساس اسرائیلی اہداف پر میزائل حملوں کا بھی دعوی کیا اور کہا ہے کہ یہ حملے کامیابی سے اپنے اہداف تک پہنچے ہیں۔ “کشیدگی کا جواب کشیدگی سے دیں گے” گروپ کے بیان میں کہا گیا ہے کہ یہ میزائل حملے اسرائیل کی جانب سے ایران، فلسطین، لبنان، عراق اور یمن میں جاری “جارحیت” کے جواب میں کئے گئے ہیں۔ مزید کہا گیا ہے کہ زمینی صورتحال میں ہونے والی پیش رفت کے مطابق فوجی کارروائیوں میں اضافہ کیا جائے گا۔ حوثیوں نے زور دیتے ہوئے کہا ہے کہ “ہم تصدیق کرتے ہیں کہ کشیدگی کا جواب کشیدگی سے دیا جائے گا”۔جس سے اشارہ ملا ہے کہ آئندہ دنوں میں ان کی کارروائیوں میں شدت آسکتی ہے۔

اسرائیلی حکام کی جانب سے ان دعوؤں پر تاحال کوئی باضابطہ ردِعمل سامنے نہیں آیا۔ تاہم اسرائیلی ذرائع ابلاغ کے مطابق دن کے اوائل میں یمن سے داغا گیا ایک میزائل فضائی دفاعی نظام نے تباہ کر دیا تھا اور حملے کے بعد اسرائیلی فضائی حدود کو عارضی طور پر پروازوں کے لیے بند کر دیا گیا ہے۔

واضح رہے کہ گزشتہ روز اسرائیل کے، بیروت کے جنوبی مضافات پر، حملہ کرنے کے بعد سے علاقے میں کشیدگی مزید بڑھ گئی ہے۔ حملے کے بعد ایران نے بھی اسرائیل کے شمالی علاقوں کی جانب متعدد میزائل داغےہیں۔ خبروں کے مطابق اسرائیل نے بھی ایران کے مغربی اور وسطی علاقوں کو نشانہ بنایا اور دارالحکومت تہران کے علاوہ اصفہان اور تبریز سمیت کئی شہروں میں دھماکوں کی آوازیں سنی گئی ہیں۔

یو این آئی۔ ع ا۔

واشنگٹن، امریکی صدر ڈونلڈ ٹرمپ نے اسرائیلی وزیراعظم نیتن یاہو کو دوٹوک پیغام دیتے ہوئے کہا ہے کہ ایران سے معاہدہ تسلیم کرنا ہوگا۔

امریکی صدر ڈونلڈ ٹرمپ نے فنانشیل ٹائمز کو ٹیلیفونک انٹرویو دیتے ہوئے اسرائیلی وزیراعظم نیتن یاہو کو دو ٹوک پیغام دیا ہے کہ اسرائیل کے پاس کوئی چوائس نہیں، اس کو ایران سے ہونے والا معاہدہ تسلیم کرنا ہوگا۔

ٹرمپ نے کہا کہ امریکہ اور ایران کے درمیان جو بھی معاہدہ ہوگا، اسے نیتن یاہو کو قبول کرنا ہوگا کیونکہ وہ کوئی فیصلہ نہیں کرتا، فیصلے میں کرتا ہوں۔

انہوں نے یہ بھی کہا کہ ایران کے حالیہ میزائل حملوں سے مذاکرات یا ممکنہ معاہدے پر کوئی اثر نہیں پڑےگا۔ امریکی صدر کا مزید کہنا تھا کہ اگر مذاکرات ناکام ہوئے تو امریکہ کمانڈو کارروائی یا ایران کیخلاف بحری ناکا بندی برقرار رکھنے سمیت دیگر آپشنز پر غور کر سکتا ہے۔

یو این آئی۔ ع ا۔

واشنگٹن، امریکی صدر ڈونلڈ ٹرمپ نے ایران کی جانب سے اسرائیل پر جوابی حملے کے بعد ردعمل ظاہر کرتے ہوئےکہا ہے کہ ایران کو مشورہ دوں گا، آپ نے اپنے میزائل داغ دیے بس اتنا کافی ہے، امید ہے اسرائیل جوابی کارروائی نہیں کرے گا۔

امریکی صدر ڈونلڈ ٹرمپ نے صحافی بارک راوڈ سے گفتگو کرتے ہوئے کہا کہ ایران میز پر واپس آئے اور معاہدہ کرے، امریکی فوج الرٹ ہے۔ صدر ڈونلڈ ٹرمپ نے کہا کہ اسرائیل کی جانب سے بیروت پر آج کے حملے پر خوش نہیں ہوں، میں ابھی نیتن یاہو کو فون کرنے جا رہا ہوں، اسرائیلی وزیر اعظم سے کہوں گا کہ جوابی حملہ نہ کرے۔ ٹرمپ نے کہا کہ نیتن یاہو جوابی حملہ کرے گا تو یہ سلسلہ ایسے ہی چلتا رہے گاجیسے 47 سال سے چل رہاہے۔

امریکی صدر نے کہا کہ ہم ایران کے ساتھ ایک حتمی معاہدے کے بہت قریب ہیں، نہیں چاہتا کہ اس صورتحال کی وجہ سے یہ ختم ہو جائے، معاہدے پر پیر، منگل یا بدھ کو دستخط ہونے تھے اور اب یہ سب کچھ ہوگیا۔

واضح رہے کہ ایران نے لبنان کے دارالحکومت بیروت پر حملوں کے جواب میں اسرائیل پر میزائل داغ دیے ہیں۔ اسرائیلئ فوج نے دعویٰ کیا ہے کہ ایران کی جانب سے اسرائیل پر میزائل فائر کیے گئے ہیں اور فضائی دفاع نظام میزائل حملوں کوناکام بنا رہا ہے۔

ایران کے اسرائیل پر جوابی میزائل حملے کے بعد ایرانی پاسداران انقلاب نے خبردار کیا ہے کہ اسرائیل پر حملہ ایک وارننگ تھا، جارحیت دہرائی گئی تو جواب مزید وسیع ہوگا۔ ایرانی پاسداران انقلاب نے اپنے بیان میں کہا کہ اسرائیل کے رامات ڈیوڈ ائیر بیس کو آئی آر جی سی ایروسپیس فورس کے بیلسٹک میزائلوں سے نشانہ بنایا۔ پاسداران انقلاب کا کہنا ہے کہ جنگ بندی کی قبولیت اس شرط پر تھی کہ تمام محاذوں پر فائرنگ بند ہو، امریکا اور اسرائیل نے اپنے وعدوں پر عمل نہیں کیا۔ پاسداران انقلاب نے خبردار کیا ہے کہ اسرائیل لبنان پر حملے روک دے، ورنہ نتائج مزید تباہ کن ہوں گے،خطے میں تمام امریکی و اسرائیلی اہداف کو نشانہ بنایا جائے گا۔ ایرانی حکام نے لبنانی دارالحکومت پر اسرائیلی حملے کے جواب میں جوابی کارروائی کی وارننگ دی تھی۔

یو این آئی۔ ع ا۔