خبراردو: پی ڈی پی صدر محبوبہ مفتی نے مرکزی سرکار کو خبردار کرتے ہوئے کہا کہ دفعہ 35Aکیساتھ چھیڑ چھاڑ کرنا بارود کو ہاتھ لگانے کے مترادف ہوگا۔ انہوں نے کہا کہ جو ہاتھ دفعہ 35Aکیساتھ چھیڑ چھاڑ کرنے کیلئے اُٹھیں گے، وہ ہاتھ ہی نہیں بلکہ پورا جسم جل کر راکھ ہوجائیگا۔

پارٹی کی 20ویں یوم تاسیس کے موقعے پر شیر کشمیر پارک سرینگر میں پی ڈی پی صدر اور سابق وزیر اعلیٰ محبوبہ مفتی نے دفعہ35Aپر جاری قیاس آرائیوں کے بیچ مرکزی سرکار کو دوٹوک الفاظ میں خبردار کرتے ہوئے کہا کہ دفعہ 35Aکیساتھ چھیڑ چھاڑ کرنا بارود کو ہاتھ لگانے کے مترادف ہوگا۔ انہوں نے کہا کہ آئینی پوزیشن کیساتھ کسی بھی قسم کی چھیڑ خوانی سے یہاں طوفان بپا ہوسکتا ہے جس کی تمام تر ذمہ داری مرکزی سرکار پر عائد ہوگی۔محبوبہ مفتی نے تاسیسی جلسے سے خطاب کرتے ہوئے پارٹی کارکنان کو ہدایت کی کہ وہ بڑی لڑائی کیلئے تیار رہیں۔ پارٹی کارکنان ذہنی طورپر خصوصی پوزیشن والی دفعہ 35Aکی حفاظت کیلئے تیار رہیں۔

ہمیں اب بہت بڑی لڑائی لڑنی ہوگی جس کیلئے ہمیں خود کو تیارکرنا ہوگا۔ انہوں نے مرکزی حکومت کو متنبہ کرتے ہوئے کہا کہ جو ہاتھ دفعہ 35Aکیساتھ چھیڑ چھاڑ کرنے کیلئے اُٹھیں گے، وہ ہاتھ ہی نہیں بلکہ پورا جسم جل کر راکھ ہوجائیگا۔محبوبہ مفتی نے کہا کہ ہم ریاست کو حاصل خصوصی پوزیشن کے دفاع کیلئے آخری دم تک لڑنے کیلئے تیار ہیں۔انہوں نے کہا کہ پی ڈی پی خصوصی شناخت کے تحفظ کو یقینی بنانے کیلئے خاموش تماشائی کا رول ادا نہیں کریگی بلکہ اس کیلئے آخری دم تک لڑے گی۔ محبوبہ کا کہنا تھا کہ اس حوالے سے پی ڈی پی اور اس سے وابستہ افراد کو ہر ممکنہ ذرائع سے ڈرایا اور دھمکایا جائیگا لیکن ہم خاموش بیٹھنے والے نہیں۔ انہوں نے بتایا کہ نئی دہلی اس بات کا ادراک بخوبی حاصل ہے کہ پی ڈی پی ہی وہ واحد سیاسی جماعت ہے جو خصوصی پوزیشن کے دفاع کیلئے قلعے کی مانند کھڑی ہے۔مرکزی سرکار جانتی ہے کہ پی ڈی پی سچائی اور اصولوں پر مبنی جماعت ہے جو عوامی خواہشات کا سودا نہیں کرسکتی۔پی ڈی پی دوغلی پالیسی پر یقین نہیں رکھتی بلکہ جو بات کشمیر میں کرتی ہے، وہی جموں اور نئی دہلی میں بھی کی جاتی ہے۔انہوں نے بتایا کہ سابق وزیر اعلیٰ عمر عبداللہ نے حال ہی میں مرکزی سرکار کو صلاح دی کہ دفعہ 35Aسے متعلق دھمکیوں کے بجائے سپریم کورٹ کے فیصلے کا انتظار کیا جائے، تاہم میں (محبوبہ مفتی) یہاں یہ بات واضح کردینا چاہتی ہے کہ جموں وکشمیر کا کوئی بھی باشندہ خصوصی پوزیشن کی منسوخی سے متعلق نہ مرکزی سرکار اور نہ ہی سپریم کورٹ کا فیصلہ قبول ہوگا۔

انہوں نے کہا کہ جموں وکشمیر میں فی الوقت حالات ٹھیک نہیں ہے، ہر طرف خوف و دہشت کا ماحول قائم ہے۔ جموں وکشمیر بنک کی سالمیت پر بھی کاری ضرب لگائی گئی، آہستہ آہستہ کوششیں کی جارہی ہے کہ کشمیری ہر محاذ پر کمزور ہونا چاہیے۔مرکزی سرکار چاہتی ہے کہ کشمیر سیاسی طور پر بھی اور اقتصادی طور پر بھی کمزور ہوجائے۔ اس کیخلاف اُٹھ کھڑے ہونے کی ضرورت ہے اور پی ڈی پی کے بغیر اور کسی پارٹی میں دم خم موجود نہیں جو مرکزی سرکارکی کشمیر دشمن پالیسیوں کا مقابلہ کرسکے۔انہوں نے کہا کہ مرکزی سرکار ہمیں مختلف طریقوں سے ڈرادھمکا سکتی ہے، ہم پر کرپشن کے الزامات لگائے جاسکتے ہیں لیکن ہم ڈرنے والوں میں سے نہیں ہے۔کشمیرنیوز سروس کے مطابق محبوبہ مفتی نے بتایا کہ مجھ پر شکنجہ کسنا آسان کام نہیں ہے لہٰذا مرکزی سرکار نے تحقیقاتی ایجنسیوں کے ذریعے سابق وزیر نعیم اختر کو نشانہ بنایا، اس کے متعلق عوام میں بدظنی پیدا کی گئی۔

میں یہاں پر یہ کہنا چاہتی ہے کہ نعیم اختر کیساتھ اختلافات ہوسکتے ہیں لیکن وہ کرپٹ نہیں ہے۔ ہمارے شوپیان کے اعجاز میر کو بھی پوچھ تاچھ کے دائرے میں لایا گیا۔ انہوں نے کہا کہ یہاں پر جنگجوؤں نے مختلف رہائشی مکانات سے سرکاری اہلکاروں سے ہتھیار چھین لئے، اعجاز میر کے رہائشی کوارٹر سے بھی بندوق چرائے گئے لیکن اس مسئلے میں مرکزی سرکار نے این آئی اے کو طلب کرتے ہوئے اعجاز میر کے ارد گرد شکنجہ کسنا شروع کیا۔انہوں نے بتایا کہ میں آپ کو بتادینا چاہتی ہوں کہ جو لڑائی ہم مرکزی سرکار کیساتھ لڑرہے ہیں، اُس میں محبوبہ مفتی کو بھی جیل کی سلاخوں کے پیچھے دھکیلا جاسکتا ہے۔اس موقعے پر جلسے میں موجود پارٹی کارکنان نے جوش و جذبے کیساتھ ”محبوبہ صاحبہ قدم بڑھاؤ، ہم تمہارے ساتھ ہیں“ کے زور دار نعرے لگائے۔