4۔جی موبائیل انٹر نیٹ پر عائد پابندی میں 27مئی تک توسیع کے بیچ وادی کشمیر کے8اضلاع میں 11اور12مئی کی درمیانی رات سے 2۔جی انٹر نیٹ خدمات بحال کردئے گئے جبکہ اس کے ساتھ ہی ایس ایم ایس سروس بھی بحال ہوگئی۔تاہم جنوبی کشمیر کے دو جڑواں اضلاع پلوامہ اور شوپیان میں یہ سروس ہنوز معطل ہے جبکہ ان دونوں اضلاع میں موبائیل کال سروس بحال کردی گئی۔

ادھر انٹر نیٹ خدمات بحال ہونے کیساتھ ہی آن لائن کلاسز اور ای۔ادائیگی بھی شروع ہوگی۔کشمیر نیوز سروس کے مطابق جنوبی ضلع پلوامہ کے بیگ پورہ گاؤں میں 6مئی بروز بدھ ایک معرکہ آرائی کے دوران حزب کمانڈرریاض نائیکوکی ساتھی سمیت ہلاکت کیساتھ ہی وادی کشمیر میں موبائیل فون خدمات بشمول انٹر نیٹ سروس بند کردی گئی۔پلوامہ اور شوپیان کو چھوڑ کر یہ سروس وادی کے دیگر اضلاع میں 3روز بعد بحال کردی گئی جبکہ6روز بعد اب 2۔جی موبائیل انٹر نیٹ خدمات بحال کر دئے گئے۔

11اور12مئی کی درمیانی رات وادی کشمیر کے8اضلاع سرینگر،بڈگام،گاندر بل،کپوارہ،بارہمولہ،بانڈی پورہ،اننت ناگ اور کولگام میں یہ سروس بحال کرد ی گئی۔تاہم جنوبی کشمیر کے پلوامہ اور شوپیان ضلعے میں موبائیل انٹر نیٹ خدمات ہنوز منقطع ہے،لیکن سوموار رات دیر گئے یہاں موبائیل فون کال سہولیت بحال کرد گئی۔وادی کشمیر میں 2۔جی انٹر نیٹ اور ایس ایم ایس سروس بحال ہونے کیساتھ ہی آن لائن کلاسز اور ای۔

ادائیگی کا عمل بھی شروع ہوگیا۔انٹر نیٹ بندش کی وجہ سے ڈاکٹر اور طلاب کافی متاثر ہوئے۔کووڈ۔19لاک داؤن کے دوران بیشتر مریض ڈاکٹروں سے موبائل پر رابطہ کرکے طبی مشورے حاصل کرتے تھے جبکہ ڈاکٹر بھی ایکدوسرے روز سے رابطے میں رہتے تھے۔طلبہ نے کہا کہ گزشتہ55دنوں سے وہ اسکول نہیں گئے اور گھروں میں قید ہیں،تاہم ایسے تیسے ہم آن لائن پڑھائی جاری رکھے ہوئے تھے،کیونکہ ٹیچرس ہمیں آن لائن پڑھاتے تھے،گزشتہ چھ روزسے یہ نظام بھی ٹھپ ہو کر رہ گیا،ویسے وادی میں کب انٹر نیٹ اور فون سروس بند ہو یہ کوئی نہیں جانتا؟۔

اگرچی 2۔جی انٹر نیٹ بحال کرنے سے کسی حد تک پیشہ ور افراد اور طلبہ کو راحت ملی،تاہم مجموعی طور پر تیز رفتارانٹر نیٹ بندش سے زندگی کا ہر ایک شعبہ مسلسل متاثر ہورہا ہے۔عام لوگ کہتے ہیں کہ وبا میں فوجی انٹر نیٹ خدمات کی مسلسل بندش سے کورونا وبا سے لڑ نے مشکلات درپیش ہیں جبکہ اس وقت تیز رفتار انٹر نیٹ لازمی ہے۔ان کا کہناتھا کہ اس وبا سے محفوظ رہنے کیلئے انٹر نیٹ سے اہم معلومات حاصل کی جاتی ہے،لیکن کشمیری اس سے محروم رہ رہے ہیں۔فورجی انٹرنیٹ کی معطلی سے طلبا اور صحافیوں کو زیادہ ہی مشکلات در پیش ہیں۔ طلبا گھروں میں بیٹھ کر پڑھائی کرنے سے قاصر ہیں اور صحافی گھروں میں بیٹھ کر اپنے پیشہ امور کی انجام دہی سے معذور ہیں۔ جموں وکشمیر میں فور جی انٹرنیٹ کی بحالی کے لئے سیاسی حلقوں کی طرف سے بلند کی گئیصدائیں بھی صدا بہ صحرا ہی ثابت ہورہی ہے۔

اس دوران جموں وکشمیر کی انتظامیہ نے یہاں 4۔جی انٹر نیٹ پر عائد پابندی میں 27مئی تک توسیع کی ہے۔اس ضمن میں ہوم ڈیپارٹمنٹ نے باضابط طور پر ایک حکمنامہ جاری کیا ہے،جس میں بتایا گیا ہے کہ ملی ٹنوں کی موجودگی میں اضافہ اور بدلہ لیکر ہلاکتیں کرنے کی کوششوں کے خدمات اور خطرات کے پیش نظر تیز رفتار انٹر نیٹ بندش میں 27مئی تک توسیع کی جارہی ہے۔یہاں یہ بات قابل ذکر ہے کہ مرکزی حکومت نے 5اگست 2019میں جموں وکشمیر کی آئینی دفعات 370و 35 اے کے تحت حاصل خصوصی اختیارات کو ختم کردیا اورجموں کو 2 مرکزی حصوں میں منقسم کرنے کے فیصلوں کے پیش نظر یہاں تمام تر مواصلاتی خدمات منقطع کردی گئی تھیں۔

اگرچہ بعد میں فون خدمات کو بتدریج بحال کیا گیا تھا اور2۔ جی انٹرنیٹ سروس بھی بحال کردی گئی،لیکن4۔ جی انٹرنیٹ خدمات ہنوز منقطع ہیں۔دریں اثناء سپریم کورٹ آف انڈیا نے سوموارکے روز جموں و کشمیر میں 4۔ جی انٹرنیٹ خدمات کی بحالی کے لئے عرض گزاروں کی طرف سے اٹھائے گئے، معاملات کو دیکھنے کیلئے مرکزی وزارت امور داخلہ کے سکریٹری کی سربراہی میں ایک اعلیٰ سطحی کمیٹی تشکیل دینے کا حکم صادر کیا ہے۔