نئی دہلی، وزیر تعلیم دھرمیندر پردھان نے اعلان کیا ہے کہ نیٹ-یو جی کا دوبارہ امتحان 21 جون کو منعقد کیا جائے گا اور طلبہ کو 14 جون تک داخلہ کارڈ (ایڈمٹ کارڈ) جاری کر دیے جائیں گے۔

مسٹر پردھان نے جمعہ کو پریس کانفرنس میں کہا کہ اگلے سال سے نیٹ کا امتحان او ایم آر شیٹ کے بجائے کمپیوٹر پر مبنی موڈ میں کرایا جائے گا۔ ساتھ ہی اس بار دوبارہ امتحان دینے والے طلبہ کو اپنی سہولت کے مطابق امتحان کےلیے شہر منتخب کرنے کے لیے ایک ہفتے کا وقت دیا جائے گا، تاکہ انہیں سفر اور دیگر پریشانیوں کا سامنا نہ کرنا پڑے۔ انہوں نے کہا کہ تین مئی کو منعقدہ امتحان کے بعد سات مئی کو کچھ شکایات سامنے آئی تھیں، جس کے بعد حکومت نے فوری تحقیقات شروع کر دیں۔ تحقیقات میں 12 مئی تک یہ واضح ہو گیا کہ “گیس پیپر” کے نام پر اصل سوال نامے باہر پہنچے تھے۔ انہوں نے کہا کہ حکومت نہیں چاہتی کہ تعلیمی مافیا کی وجہ سے کسی محنتی اور ایماندار طالب علم کا مستقبل متاثر ہو۔

انہوں نے بتایا کہ معاملے کی سنگینی کو دیکھتے ہوئے تحقیقات سی بی آئی کے سپرد کر دی گئی ہیں۔ امتحان مافیا کے خلاف حکومت کی لڑائی جاری رہے گی اور اس بار تحقیقاتی ایجنسیاں پوری سختی سے کارروائی کریں گی۔ انہوں نے انتباہ دیتے ہوئے کہا کہ امتحان میں گڑبڑ کرنے والوں کو سخت سزا بھگتنا ہوگی۔ مرکزی وزیر نے سوشل میڈیا پر پھیلنے والی افواہوں اور گمراہ کن معلومات سے ہوشیار رہنے کی اپیل بھی کی۔ انہوں نے کہا کہ ڈیجیٹل دور میں فرضی خبریں ایک بڑا چیلنج بن چکی ہیں، اس لیے طلبہ اور والدین صرف حکومت یا این ٹی اے کی جانب سے جاری کردہ سرکاری معلومات پر ہی بھروسہ کریں۔

مسٹر پردھان نے کہا کہ این ٹی اے ہر سال کروڑوں طلبہ کے امتحانات منعقد کرتی ہے اور “زیرو ایرر” کو یقینی بنانا حکومت کی ذمہ داری ہے۔ انہوں نے کہا کہ طلبہ کے مفادات کا تحفظ کرنا حکومت کی اولین ترجیح ہے اور امتحان کے عمل کو مکمل طور پر منصفانہ اور شفاف بنایا جائے گا۔

یواین آئی۔ایف اے

نئی دہلی، کانگریس نے پیٹرول، ڈیزل اور سی این جی کی قیمتوں میں اضافے پر وزیرِ اعظم نریندرمودی کو تنقید کا نشانہ بناتے ہوئے الزام لگایا ہے کہ انتخابات ختم ہوتے ہی حکومت نے عوام سے “وصولی” شروع کر دی ہے کانگریس نے سوشل میڈیا پلیٹ فارم ایکس پر جاری ایک پوسٹ میں نریندر مودی کو “مہنگائی مین” قرار دیتے ہوئے کہا، “مہنگائی مین مودی نے آج پھر عوام پر کوڑا برسایا۔ پیٹرول اور ڈیزل تین تین روپے مہنگا کر دیا گیا، جبکہ سی این جی کی قیمت میں بھی دو روپے اضافہ کر دیا گیا۔ انتخابات ختم، مودی کی وصولی شروع۔ حکومت مہنگائی پر قابو پانے میں ناکام رہی ہے اور عام لوگوں پر مسلسل مالی بوجھ بڑھایا جا رہا ہے۔”

اسی دوران کانگریس کے شعبۂ مواصلات کے انچارج جے رام رمیش نے کہا کہ جب عالمی سطح پر خام تیل کی قیمتیں کم تھیں یا گر رہی تھیں تو کانگریس مسلسل یہ مطالبہ کرتی رہی کہ اس کا فائدہ ہندستانی صارفین تک پہنچایا جائے اور گھریلو سطح پر گیس، پیٹرول اور ڈیزل کی قیمتیں کم کی جائیں، لیکن ایسا نہیں کیا گیا اور صارفین کو کوئی راحت نہیں ملی۔

انہوں نے مزید الزام لگایا کہ اب مغربی ایشیا میں جنگ کے باعث عالمی تیل قیمتوں میں اضافے اور اسمبلی انتخابات کے اختتام کے بعد مودی حکومت نے پہلے کمرشل ایل پی جی کی قیمتیں بڑھائیں اور اب پیٹرول و ڈیزل بھی مہنگا کر دیا ہے۔

جئے رام رمیش کے مطابق اس اقدام سے مہنگائی میں مزید اضافہ یقینی ہے، جو موجودہ مالی سال میں تقریباً چھ فیصد تک پہنچ سکتی ہے، اور اس سے اقتصادی ترقی کی رفتار کے اندازوں پر بھی منفی اثر پڑ سکتا ہے۔

یو این آئی۔ ایم جے

نئی دہلی، تیل کی مارکیٹنگ کمپنیوں نے جمعہ کے روز پیٹرول اور ڈیزل کی قیمتوں میں فی لیٹر تین تین روپے کا اضافہ کر دیا ہے ملک کی سب سے بڑی تیل کمپنی انڈین آئل کارپوریشن کے مطابق قومی دارالحکومت دہلی میں غیر برانڈڈ ڈیزل کی قیمت اب 90.67 روپے فی لیٹر ہو گئی ہے، جو پہلے 87.67 روپے تھی۔ اسی طرح پیٹرول کی قیمت بھی تین روپے بڑھا کر 97.77 روپے فی لیٹر کر دی گئی ہے کمپنی نے اپنے برانڈڈ (پریمیم) پیٹرول ایکس پی 95 کی قیمت 2.99 روپے بڑھا کر 104.88 روپے فی لیٹر اور برانڈڈ ڈیزل ایکس جی کی قیمت تین روپے بڑھا کر 95.95 روپے فی لیٹر مقرر کر دی ہے۔

گزشتہ 28 فروری کو مشرقِ وسطیٰ کے بحران کے آغاز کے بعد برانڈڈ ڈیزل کی قیمت میں یہ دوسرا اضافہ ہے۔ اس سے قبل مارچ میں بھی اس کی قیمت میں دو روپے فی لیٹر کا اضافہ کیا گیا تھا۔

یو این آئی۔ ایم جے