نئی دہلی، کانگریس نے پیٹرول، ڈیزل اور سی این جی کی قیمتوں میں اضافے پر وزیرِ اعظم نریندرمودی کو تنقید کا نشانہ بناتے ہوئے الزام لگایا ہے کہ انتخابات ختم ہوتے ہی حکومت نے عوام سے “وصولی” شروع کر دی ہے کانگریس نے سوشل میڈیا پلیٹ فارم ایکس پر جاری ایک پوسٹ میں نریندر مودی کو “مہنگائی مین” قرار دیتے ہوئے کہا، “مہنگائی مین مودی نے آج پھر عوام پر کوڑا برسایا۔ پیٹرول اور ڈیزل تین تین روپے مہنگا کر دیا گیا، جبکہ سی این جی کی قیمت میں بھی دو روپے اضافہ کر دیا گیا۔ انتخابات ختم، مودی کی وصولی شروع۔ حکومت مہنگائی پر قابو پانے میں ناکام رہی ہے اور عام لوگوں پر مسلسل مالی بوجھ بڑھایا جا رہا ہے۔”

اسی دوران کانگریس کے شعبۂ مواصلات کے انچارج جے رام رمیش نے کہا کہ جب عالمی سطح پر خام تیل کی قیمتیں کم تھیں یا گر رہی تھیں تو کانگریس مسلسل یہ مطالبہ کرتی رہی کہ اس کا فائدہ ہندستانی صارفین تک پہنچایا جائے اور گھریلو سطح پر گیس، پیٹرول اور ڈیزل کی قیمتیں کم کی جائیں، لیکن ایسا نہیں کیا گیا اور صارفین کو کوئی راحت نہیں ملی۔

انہوں نے مزید الزام لگایا کہ اب مغربی ایشیا میں جنگ کے باعث عالمی تیل قیمتوں میں اضافے اور اسمبلی انتخابات کے اختتام کے بعد مودی حکومت نے پہلے کمرشل ایل پی جی کی قیمتیں بڑھائیں اور اب پیٹرول و ڈیزل بھی مہنگا کر دیا ہے۔

جئے رام رمیش کے مطابق اس اقدام سے مہنگائی میں مزید اضافہ یقینی ہے، جو موجودہ مالی سال میں تقریباً چھ فیصد تک پہنچ سکتی ہے، اور اس سے اقتصادی ترقی کی رفتار کے اندازوں پر بھی منفی اثر پڑ سکتا ہے۔

یو این آئی۔ ایم جے

نئی دہلی، تیل کی مارکیٹنگ کمپنیوں نے جمعہ کے روز پیٹرول اور ڈیزل کی قیمتوں میں فی لیٹر تین تین روپے کا اضافہ کر دیا ہے ملک کی سب سے بڑی تیل کمپنی انڈین آئل کارپوریشن کے مطابق قومی دارالحکومت دہلی میں غیر برانڈڈ ڈیزل کی قیمت اب 90.67 روپے فی لیٹر ہو گئی ہے، جو پہلے 87.67 روپے تھی۔ اسی طرح پیٹرول کی قیمت بھی تین روپے بڑھا کر 97.77 روپے فی لیٹر کر دی گئی ہے کمپنی نے اپنے برانڈڈ (پریمیم) پیٹرول ایکس پی 95 کی قیمت 2.99 روپے بڑھا کر 104.88 روپے فی لیٹر اور برانڈڈ ڈیزل ایکس جی کی قیمت تین روپے بڑھا کر 95.95 روپے فی لیٹر مقرر کر دی ہے۔

گزشتہ 28 فروری کو مشرقِ وسطیٰ کے بحران کے آغاز کے بعد برانڈڈ ڈیزل کی قیمت میں یہ دوسرا اضافہ ہے۔ اس سے قبل مارچ میں بھی اس کی قیمت میں دو روپے فی لیٹر کا اضافہ کیا گیا تھا۔

یو این آئی۔ ایم جے

نئی دہلی، کانگریس کے سابق صدر اور لوک سبھا میں اپوزیشن لیڈر راہل گاندھی نے امریکہ کے ساتھ تجارتی معاہدے کے معاملے پر ایک بار پھر وزیرِ اعظم نریندر مودی پر الزام عائد کیا ہے کہ یہ معاہدہ اپنے دوست صنعت کار گوتم آڈانی کے مفاد میں کیا ہے۔ راہل گاندھی نے جمعہ کو سوشل میڈیا پلیٹ فارم ایکس پر کہا کہ “یہ تجارتی معاہدہ نہیں بلکہ اڈانی کی رہائی کا سودا کیا ہے”، اور وزیرِ اعظم کو “کمپرومائزڈ پی ایم” قرار دیتے ہوئے ان پر سمجھوتہ کرنے کا الزام لگایا۔

کانگریس کے محکمہ مواصلات کے انچارج جے رام رمیش نے کہا ، “اب یہ واضح ہے کہ وزیر اعظم نے ہندوستان اور امریکہ کے درمیان انتہائی مایوس کن اور یک طرفہ تجارتی معاہدے کو کیوں قبول کیا ، جو دراصل امریکہ کے حق میں یک طرفہ معاہدہ تھا ۔ یہ بھی واضح ہے کہ انہوں نے اچانک 10 مئی 2025 کو صدر ٹرمپ کی دھمکیوں کے سامنے جھک کر ، قومی مفاد کے بجائے ان کے دباؤ میں آپریشن سندور کو کیوں روک دیا ،۔ “

اطلاعات کے مطابق ٹرمپ انتظامیہ اب تاجر اڈانی کے خلاف بدعنوانی سے متعلق تمام الزامات واپس لینے کی تیاری کر رہی ہے ۔ وزیر اعظم اور کتنا سمجھوتہ کریں گے “

یو این آئی۔ ایم جے