ابو ظہبی، ہندوستان اور متحدہ عرب امارات (یو اے ای) نے اپنی اسٹریٹجک شراکت داری کو مزید مستحکم کرنے کے لیے توانائی، دفاع، بحری امور، ٹیکنالوجی اور معاشی شعبوں میں چھ اہم معاہدوں اور مفاہمت ناموں پر جمعہ کے روز دستخط کیے۔ اس کے ساتھ ہی متحدہ عرب امارات نے ہندوستان میں پانچ ارب ڈالر کی سرمایہ کاری کا بھی اعلان کیا ہے۔

یہ معاہدے وزیراعظم نریندر مودی اور یو اے ای کے صدر شیخ محمد بن زاید آل نہیان کے درمیان یہاں دوطرفہ بات چیت کے بعد کیے گئے۔

ان میں انڈین اسٹریٹجک پیٹرولیم ریزرو لمیٹڈ (آئی ایس پی آر ایل) اور ابو ظہبی نیشنل آئل کمپنی (اے ڈی این او سی) کے درمیان ہندوستان میں وشاکھاپٹنم اور چاندی کول میں تین کروڑ بیرل تک خام تیل کے ذخیرہ کرنے کی صلاحیتوں، یو اے ای کے فجیرہ میں اسٹوریج اور ہندوستان میں ایل این جی و ایل پی جی اسٹوریج میں تعاون کا معاہدہ کلیدی اہمیت کا حامل ہے۔ ہندوستان کی انڈین آئل لمیٹڈ (آئی او سی ایل) اور امارات کی ایڈنوک نے ایل پی جی سپلائی پر اسٹریٹجک تعاون کے ایک اور معاہدے پر دستخط کیے، جس میں طویل مدتی فراہمی اور خریداری کے معاہدوں کے امکانات کا جائزہ لیا جائے گا۔ دفاعی شعبے میں دونوں ممالک نے صنعتی تعاون، جدید ٹیکنالوجی، تربیت، خصوصی آپریشنز، بحری سلامتی، سائبر ڈیفنس اور محفوظ مواصلات کے لیے ایک ایسا ڈھانچہ قائم کیا ہے جس سے باہمی تعاون اور اسٹریٹجک ہم آہنگی کو فروغ ملے گا۔

کوچین شپ یارڈ لمیٹڈ (سی ایس ایل) اور ڈرائڈ ڈاکس ورلڈ (ڈی ڈی بلیو) نے واڈینار میں شپ ریپیئر کلسٹر قائم کرنے کے لیے مفاہمت نامہ پر دستخط کیے، جس میں آف شور فیبریکیشن بھی شامل ہے۔ اس کے علاوہ، کوچین شپ یارڈ، ڈرائڈ ڈاکس ورلڈ اور سینٹر آف ایکسی لینس ان میری ٹائم اینڈ شپ بلڈنگ (سی ای ایم ایس) کے درمیان ایک سہ فریقی معاہدہ ہندوستانی بحری افرادی قوت کو تربیت دینے اور روزگار فراہم کرنے کا فریم ورک تیار کرے گا، جو ہندوستان کو جہاز سازی اور مرمت کے ماہرین کے عالمی مرکز کے طور پر مستحکم کرے گا۔

ٹیکنالوجی کے شعبے میں ہندوستان کے سینٹر فار ڈویلپمنٹ آف ایڈوانسڈ کمپیوٹنگ (سی ڈیک) اور یو اے ای کے جی-42 نے ہندوستان کے اے آئی مشن کے حصے کے طور پر 8 ایکسا فلاپ سپر کمپیوٹنگ کلسٹر قائم کرنے پر اتفاق کیا ہے۔ متحدہ عرب امارات کے سرمایہ کاروں نے بھی بڑے مالی وعدوں کا اعلان کیا ہے، جن میں ابو ظہبی انویسٹمنٹ اتھارٹی (اے ڈی آئی اے) اور ہندوستان کے نیشنل انفراسٹرکچر اینڈ انویسٹمنٹ فنڈ (این آئی آئی ایف) کی جانب سے بنیادی ڈھانچے میں ایک ارب ڈالر تک کی سرمایہ کاری، ایمریٹس نیو ڈویلپمنٹ بینک (ای این بی ڈی) کی طرف سے آر بی ایل بینک آف انڈیا میں تین ارب ڈالر کی سرمایہ کاری اور انٹرنیشنل ہولڈنگ کمپنی کی جانب سے سممان کیپیٹل آف انڈیا میں ایک ارب ڈالر کی سرمایہ کاری شامل ہے۔ ان معاہدوں اور سرمایہ کاری سے دونوں ممالک کے معاشی اور اسٹریٹجک تعلقات مزید گہرے ہوں گے، جس سے ہندوستان کی توانائی اور دفاعی صلاحیتوں میں اضافے کے ساتھ ساتھ ٹیکنالوجی اور بحری شعبے کی ترقی کو بھی تقویت ملے گی۔

یواین آئی۔ م س

ابو ظہبی، چار یورپی ممالک کے دورے سے قبل جمعہ کے روز مختصر دورے پر یہاں پہنچے وزیراعظم نریندر مودی کا متحدہ عرب امارات (یو اے ای) کے صدر شیخ محمد بن زاید آل نہیان نے ہوائی اڈے پر گرمجوشی سے استقبال کیا مسٹر مودی کا بعد ازاں روایتی خیر مقدم کیا گیا۔ اس کے بعد دونوں ممالک کے درمیان وفود کی سطح پر بات چیت شروع ہوئی۔ وفود کی سطح کی بات چیت کے بعد وزیراعظم کا صدر آل نہیان کے ساتھ علیحدہ سے ملاقات کا بھی پروگرام ہے۔

مسٹر مودی آج صبح متحدہ عرب امارات کے لیے روانہ ہوئے تھے۔ ابو ظہبی سے ان کا آج شام ہی نیدرلینڈز جانے کا پروگرام ہے۔

یواین آئی۔ م س

واشنگٹن، امریکی سینٹرل کمانڈ کے سربراہ ایڈمرل بریڈ کوپر نے دعویٰ کیا ہے کہ امریکی بمباری کے نتیجے میں ایران کی اپنے پڑوسی ممالک اور امریکہ کے مفادات کو خطرے میں ڈالنے کی صلاحیت نمایاں طور پر کم ہو گئی ہے، جبکہ تہران کا دفاعی شعبہ 90 فیصد تک پیچھے ہٹ چکا ہے۔امریکی سینیٹ کی ایک کمیٹی کے سامنے بیان دیتے ہوئے بریڈ کوپر نے کہا کہ ایران اب پہلے کی طرح خطے یا امریکہ کیلئے خطرہ بننے کی صلاحیت نہیں رکھتا۔

انہوں نے کہا کہ جنگ کے نتیجے میں مجموعی طور پر مشرقِ وسطیٰ میں ایران کے پیدا کردہ خطرے میں نمایاں کمی آئی ہے۔

تاہم ایڈمرل بریڈ کوپر نے ان رپورٹس پر براہ راست تبصرہ کرنے سے گریز کیا جن میں کہا گیا تھا کہ ایران اب بھی زیرِ زمین تنصیبات میں میزائل اور ڈرونز کی بڑی صلاحیتیں محفوظ رکھے ہوئے ہے۔

انہوں نے دعویٰ کیا کہ ایران اب اپنے اتحادی گروپوں، حزب اللہ، حوثی تحریک اور حماس کو اسلحہ اور دیگر وسائل منتقل کرنے کے قابل نہیں رہا کیونکہ نقل و حمل کے راستے اور طریقہ کار منقطع کر دیے گئے ہیں۔

دوسری جانب امریکی نیوز ویب سائٹ ایگزیوز کی رپورٹ کے مطابق امریکی حکام نے اشارہ دیا ہے کہ امریکی صدر ڈونلڈ ٹرمپ کے دورۂ چین کے بعد ایران کے خلاف مزید سخت اقدامات زیر غور ہیں۔

رپورٹ کے مطابق ”پروجیکٹ فریڈم” کو دوبارہ فعال کرنے پر غور کیا جا رہا ہے، جس کا مقصد امریکی بحری بیڑے کے ذریعے آبنائے ہرمز میں جہاز رانی کو یقینی بنانا تھا۔

اسی کے ساتھ امریکی حکام ایران کے انفراسٹرکچر پر نئے حملوں کے امکان کا بھی جائزہ لے رہے ہیں، جبکہ اسرائیلی حکام نے عندیہ دیا ہے کہ اگر امریکہ دوبارہ فوجی کارروائی شروع کرتا ہے تو اسرائیل ہائی الرٹ پر ہو گا۔

ادھر روسی غیر ملکی انٹیلی جنس سروس کے سربراہ سرگئی ناریشکن نے خبردار کیا ہے کہ ایران سے متعلق تنازع کے خاتمے کے امکانات اب بھی دور ہیں اور کشیدگی کی نئی لہر کو مسترد نہیں کیا جا سکتا۔

انہوں نے کہا کہ واشنگٹن اور تل ابیب نسبتاً آسان فتح کی توقع کر رہے تھے، تاہم ایسا نہیں ہوا کیونکہ ایران اب بھی بڑی فوجی صلاحیتیں رکھتا ہے۔

سرگئی ناریشکن کے مطابق مذاکرات جاری ہیں اور فریقین امن معاہدوں کی تجاویز کا تبادلہ کر رہے ہیں، لیکن فی الحال تنازع کے خاتمے کے واضح آثار نظر نہیں آ رہے۔

یواین آئی۔ م س