خبراردو:

نیشنل کانفرنس صدر ڈاکٹر فاروق عبداللہ نے اتوار کو اپنی رہائش گاہ واقع گپکار میں ذرائع ابلاغ کے نمائندوں سے بات چیت کرتے ہوئے کہا کہ دھونس و دباؤ، گرفتاریوں اور قید و بند سے کوئی مسئلہ حل نہیں ہوگا، بات چیت سے ہی ہمیشہ مسئلے حل ہوئے ہیں اور آگے بھی ہونگے اسی لئے ہمیں آگے بھی بات چیت کرنے کی کوشش کرنی چاہئے۔ این سی صدر نے اپنی رہائش گاہ پر منعقدہ تقریب جس کا انعقاد سابق آئی جی پولیس شفقت وٹالی کی نیشنل کانفرنس میں شمولیت اختیار کرنے کے سلسلے میں کیا گیا تھا، میں میڈیا سے بات کرتے ہوئے کہا کہ ’’جو ماحول بنایا جارہاہے اُس سے حالات ٹھیک نہیں بلکہ اور بگڑ جائیں گے،یاسین ملک کو گرفتار کرکے جموں پہنچایا گیا، جماعت اسلامی پر پابندی عائد کرکے اُن کیخلاف کریک ڈاؤن کیا گیا، کیا اس سے مسئلہ حل ہوگا؟ کیا آپ کو لگتا ہے کہ اس سے لوگ چھپ بیٹھیں گے؟انہوں نے کہا کہ پہلے بھی جگموہن کے دورمیں جماعت اسلامی کیخلاف اس قسم کی کارروائیاں کی گئیں، اُس وقت بھی کوئی نتیجہ نہیں نکلا اور نہ آج کوئی نتیجہ نکلے گا۔ اُس وقت بھی ایسا دور آیا جب وزیرا عظم کو سب سے بات کرنی پڑی اور آج بھی ایسا کرنے کی ضرورت ہے۔ جماعت اسلامی پر پابندی اور کریک ڈاؤن کو 35اے کیساتھ جوڑنے کی افواہوں کو رد کرتے ہوئے ڈاکٹر فاروق عبداللہ نے کہا کہ نیشنل کانفرنس 35اے کے دفاع میں سب سے آگے کھڑی ہے، پھر تو ہمیں بھی جیل میں ہونا چاہئے اور دیگر جماعتوں کو بھی جو آئین کی اس دفعہ کی رکھوالی کیلئے آگے آئے ہیں۔

انہوں نے کہا کہ حکومت ہند کو کشمیر میں اس طرح کی روش کو ترک کرنا چاہئے جو ماحول کی خرابی کا سبب بن سکتی ہے۔ ہندوپاک سے دوستی کی اپیل کرتے ہوئے نیشنل کانفرنس صدر نے کہا کہ ’’ہمارے سر پر جنگ ہے،ہم امن چاہتے ہیں، ہم ہندوستان اور پاکستان کی دوستی کے متمنی ہیں، دونوں ممالک کو بات چیت کرکے کشمیرکا سیاسی حل نکالنا ہی پڑے گا اور ہمیں اٹانومی دینی پڑے گی، وہاں بھی دینی پڑے گی جو حصہ اُن کے پاس ہے، اس کے بغیر کوئی راستہ نہیں نکلے گا۔کشمیرنیوز سروس کے مطابق ڈاکٹر فاروق عبداللہ نے کہا کہ جو پارٹی برسراقتدار ہے وہ مختلف مذاہب کے لوگوں میں تفرقہ ڈال رہی ہے، جو کسی المیہ سے کم نہیں۔ ملک کی اقلتیں خصوصاً مسلمان خوفزدہ ہیں جو انتہائی افسوسناک ہے۔ وزیر اعظم کو یہ بات صاف کر لینی چاہئے کہ یہ ملک کسی ایک جماعت یا کسی ایک مذہب کا نہیں ہے، بلکہ یہ سب کا ملک ہے اور ہم سب کو اس میں امن و امان کیساتھ بود باش کرنے کا حق ہے۔ اس موقعے پر سابق آئی جی پی شفقت وٹالی نے پارٹی صدر اور سینئر لیڈران کی موجودی میں نیشنل کانفرنس میں شمولیت اختیار کی۔

پارٹی لیڈران نے شفقت وٹالی کا نیشنل کانفرنس میں خیر مقدم کرتے ہوئے انہیں پھولوں کے ہار پہنائے۔اُدھر جموں میں ایک تقریب کے دوران ایڈوکیٹ کارتار سنگھ، ایڈوکیٹ اوپسنا ٹھاکر، ایڈوکیٹ وجران، کے ایس ٹھاکر، ریاض احمد اور رسل سنگھ سمیت متعدد کئی وکلاء، سیاسی اور سماجی شخصیات نے نیشنل کانفرنس میں شمولیت اختیار کیا۔ پارٹی صدر ڈاکٹر فاروق عبداللہ اور صوبائی صدر جموں دیوندر سنگھ رانا نے ایک تقریب پر پارٹی میں شمولیت اختیار کرنے والوں کا خیر مقدم کیا اور اُنہیں پھولوں کے ہار پہنائے۔اس موقعے پر پارٹی کے سینئر لیڈران رتن لعل گپتا اور کشمیرا سنگھ بھی موجود تھے۔اس موقعے پر ڈاکٹر فاروق عبداللہ نے جموں میں گرینیڈ دھماکے کی شدید الفاظ میں مذمت کی اور کہا کہ اس دھماکے کے پیچھے وہ لوگ ملوث ہیں جو جموں و کشمیر میں انتشار اور خلفشار پھیلانے کی چاہتے ہیں ہمیں اتحاد و اتفاق کی ساتھ ساتھ آپسی بھائی چارے کو قائم رکھ کر ان عناصر کے شرپسند اور مذموم ارادوں کو ناکام بنانا ہوگا۔