سرینگر،پیپلز کانفرنس کے صدر اور رکن اسمبلی سجاد لون نے نیشنل کانفرنس اور پی ڈی پی کو کڑی تنقید کا نشانہ بناتے ہوئے کہا ہے کہ یہ دونوں جماعتیں منشیات مخالف مہم اور مبینہ اسمگلروں کے خلاف انہدامی کارروائیوں پر عوام کو گمراہ کر رہی ہیں۔سجاد لون نے الزام لگایا کہ ان جماعتوں کی قیادت سرینگر میں بیٹھ کر سرکاری کارروائیوں کی مذمت کرتی ہے، جبکہ دیگر اضلاع میں ان کے ارکان اسمبلی لیفٹیننٹ گورنر کے بیانات کی تائید کرتے نظر آتے ہیں۔ انہوں نے کہا”آج کے ڈیجیٹل دور میں سیاسی دوغلا پن چھپا نہیں رہ سکتا۔ این سی اور پی ڈی پی کے لیڈر سرینگر میں ایک بات کرتے ہیں اور کپواڑہ، بارہمولہ اور بڈگام جیسے اضلاع میں بالکل مختلف موقف اختیار کرتے ہیں۔ یہ عوام کے ساتھ مذاق ہے۔”

واضح رہے کہ پولیس نے ‘نشہ مکت جموں و کشمیر’ مہم کے تحت منشیات کے کاروبار سے وابستہ افراد کی رہائشی اور تجارتی املاک کو منہدم کرنا شروع کیا ہے۔

حکومت کا کہنا ہے کہ یہ کارروائی منشیات کے تاجروں کو واضح پیغام دینے کے لیے ضروری ہے۔

حال ہی میں وزیر صحت سکینہ ایتو نے پولیس پر الزام لگایا کہ وہ اس مہم کا استعمال لوگوں کو نشانہ بنانے کے لیے کر رہی ہے۔ اسی طرح آزاد رکن اسمبلی شیخ خورشید نے بھی کپواڑہ میں لیفٹیننٹ گورنر کے مارچ کا بائیکاٹ کرتے ہوئے اسے بے گناہ لوگوں کو ہراساں کرنے کا ذریعہ قرار دیا۔

سجاد لون نے ریاست میں شراب پر پابندی کے حوالے سے جاری بحث کو بھی ‘سیاسی ڈرامہ’ قرار دیا۔ انہوں نے کہا کہ اقتدار میں رہتے ہوئے کسی بھی جماعت نے اس پر پابندی نہیں لگائی اور اب یہ محض انتخابی دھوکہ دہی ہے۔مزید برآں، محبوبہ مفتی کی جانب سے تبادلوں میں رشوت خوری کے الزامات پر تبصرہ کرتے ہوئے سجاد لون نے طنزیہ انداز میں کہا”تبادلوں میں کرپشن اس سطح پر پہنچ چکی ہے کہ اب ‘تبادلوں’ کو حکومت کی صنعتی پالیسی کا حصہ بنا دینا چاہیے۔

یواین آئی ۔م اع

سری نگر، جموں و کشمیر کرائم برانچ کے خصوصی ونگ نے زمین کی فروخت سے جڑے ایک بڑے گھوٹالے کی تحقیقات کے سلسلے میں جمعرات کو سری نگر اور بڈگام کے اضلاع میں مختلف مقامات پر تلاشی لی۔

یہ کارروائی سال 2026 میں درج ایک ایف آئی آر کے سلسلے میں کی گئی ہے۔ یہ مقدمہ ہمہامہ کے ایک رہائشی کی شکایت پر درج کیا گیا تھا، جس نے الزام لگایا تھا کہ اسے سری نگر کے علاقے ‘نارکارہ’ میں زمین فروخت کرنے کے بہانے لاکھوں روپے کا چونا لگایا گیا ہے۔حکام کے مطابق ابتدائی تحقیقات سے پتہ چلا ہے کہ اس منظم دھوکہ دہی میں طارق احمد صوفی، ساکنہ تلسی باغ، سری نگر (مرکزی ملزم)۔طارق احمد وانی، ساکنہ نارکارہ، بڈگام (زمین کا دلال) ملوث ہیں۔

الزام ہے کہ ملزمان نے اس وقت کے پٹواری کے ساتھ ملی بھگت کر کے زمین کے جعلی دستاویزات تیار کیے۔ان افراد نے مبینہ طور پر ایک مجرمانہ سازش کے تحت شکایت کنندہ کو دھوکہ دیا اور زمین کے لین دین کے نام پر خطیر رقم غبن کر لی۔کیس کو منطقی انجام تک پہنچانے اور ٹھوس شواہد اکٹھا کرنے کے لیے ایگزیکٹو مجسٹریٹس کی موجودگی میں ملزمان کے گھروں اور دیگر ٹھکانوں کی تلاشی لی گئی۔ اس دوران کرائم برانچ نے کئی قابلِ اعتراض دستاویزات اور اہم ثبوت اپنے قبضے میں لے لیے ہیں، جن سے تفتیش میں مزید مدد ملنے کی توقع ہے۔

یواین آئی ۔م اع

سرینگر، ہندوستانی فوج کی شمالی کمان کے کمانڈر لیفٹیننٹ جنرل پرتیک شرما نے آج شمالی کشمیر میں لائن آف کنٹرول کے اگلے مورچوں کا دورہ کیا۔ اس دورے کا مقصد موسم گرما کے لیے آپریشنل حکمت عملی اور خطے میں فوج کی مجموعی تیاریوں کا معائنہ کرنا تھا۔لائن آف کنٹرول پر تعینات دستوں سے بات چیت کرتے ہوئے لیفٹیننٹ جنرل شرما نے ان کے غیر متزلزل جذبے، آپریشنل مہارت اور ملک کے لیے ان کی انتھک وابستگی کو سراہا۔

شمالی کمان نے سوشل میڈیا پر اپنے پیغام میں بتایا کہ آرمی کمانڈر نے تمام رینک کے اہلکاروں پر زور دیا کہ وہ اپنی آپریشنل صلاحیتوں میں مہارت حاصل کریں اور ہر وقت چوکنا، مستعد اور کسی بھی چیلنج کے لیے تیار رہیں۔سیکیورٹی حکام کے مطابق، شمالی کشمیر کے بالائی علاقوں میں برف پگھلنے کے ساتھ ہی سرحد پار سے دراندازی کے خطرات بڑھ جاتے ہیں۔

موسم گرما کے روایتی خطرات کے پیش نظر فوج نے سرحد پر نگرانی کا نظام مزید سخت کر دیا ہے۔

وہ علاقے جو شدید برف باری کے باعث سردیوں میں کٹ کر رہ جاتے ہیں، اب دوبارہ قابلِ رسائی ہو گئے ہیں۔ اسی لیے سیکورٹی فورسز نے دراندازی روکنے کے اقدامات کو مضبوط کیا ہے اور سرحد پر فوج کی تعیناتی کے پیٹرن کا ازسرِ نو جائزہ لیا ہے۔یہ دورہ اس بات کی عکاسی کرتا ہے کہ ہندوستانی فوج سرحدوں پر کسی بھی قسم کی دراندازی کی کوشش کو ناکام بنانے کے لیے پوری طرح متحرک اور مستعد ہے۔

یواین آئی ۔م اع