مسقط، عمان کے وزیرِ خارجہ بدر بن حمد البوسعیدی نے سلطنتِ عمان کے دارالحکومت مسقط میں ایرانی اعلیٰ سطحی وفد کے ساتھ ملاقات کے بعد بین الاقوامی قوانین اور آبنائے ہرمز سے محفوظ اور بلا اجرت آمد و رفت کو برقرار رکھنے کے عزم کا اعادہ کیا ہے۔

البوسعیدی نے سوشل میڈیا پر جاری اپنے ایک بیان میں بتایا کہ ایرانی پارلیمان کے اسپیکر محمد باقر قالیباف اور ایرانی وزیرِ خارجہ عباس عراقچی کے ساتھ ہونے والی بات چیت میں ایران اور امریکہ کے درمیان طے پانے والے حالیہ مفاہمت نامے بالخصوص آبنائے ہرمز سے متعلق شقوں پر تبادلہ خیال کیا گیا۔

یہ ملاقات قالیباف اور عراقچی کے عمان پہنچنے کے بعد عمل میں آئی، جہاں وہ اس تزویراتی اہمیت کے حامل آبنائے کے انتظام و انصرام کا جائزہ لینے آئے تھے۔ البوسعیدی نے کہا کہ ہم نے بین الاقوامی قوانین کی پاسداری اور آبنائے ہرمز سے بحری جہازوں کی محفوظ اور آزادانہ نقل و حرکت کو برقرار رکھنے کے لیے اپنے پختہ عزم کا اعادہ کیا ہے۔”

عمان کا یہ بیان سوئٹزرلینڈ کے علاقے برگرنسٹاک میں امریکہ اور ایران کے درمیان ہونے والے مذاکرات کے بعد، اتوار کے روز قطر اور پاکستان کی جانب سے جاری کردہ مشترکہ اعلامیے کے تناظر میں سامنے آیا ہے۔ اس اعلامیے میں کہا گیا تھا کہ فریقین نے پاکستان کے دارالحکومت اسلام آباد میں طے پانے والے مفاہمت نامے کے فریم ورک کے تحت، لبنان میں فوجی کارروائیوں کو روکنے کے فیصلے پر قائم رہنے پر اتفاق کیا ہے۔

اس سلسلے میں دونوں ثالث ممالک کی مدد سے ایک “تنازعات سے بچاؤ کا سیل” قائم کیا جائے گا جس میں امریکہ، ایران اور لبنان شامل ہوں گے۔ امریکہ اور ایران نے گزشتہ ہفتے دور رہتے ہوئے ڈیجیٹل طور پر اس مفاہمت نامے پر دستخط کیے تھے، جس کے تحت ایران کے افزودہ یورینیم کے ذخائر کے مستقبل، اس کے جوہری پروگرام اور دیگر دیرینہ حل طلب مسائل سمیت تمام تنازعات کو نمٹانے کے لیے 60 دنوں کا مذاکراتی عمل شروع کیا گیا ہے۔ اس 14 نکات پر مشتمل مفاہمت نامے میں لبنان سمیت تمام محاذوں پر فوجی کشیدگی کے فوری اور مستقل خاتمے، ایران پر عائد امریکی بحری ناکہ بندی کو ہٹانے اور آبنائے ہرمز سے تجارتی جہازوں کی محفوظ گزر گاہ کی ضمانت دی گئی ہے۔

یو این آئی۔ ع ا۔

بروسیلز، یورپ کے بیشتر علاقے شدید گرمی کی زد میں ہیں، فرانس میں سخت گرمی کے باعث 5 افراد ہلاک ہوگئے جن میں دو کم عمر بچے بھی شامل ہیں جب کہ نہاتے ہوئے 13 افراد ڈوب کر ہلاک ہوئے۔

برطانوی خبر رساں ایجنسی کے مطابق وسطی فرانس کے شہر پواتیے میں گرمی کا 78 سالہ ریکاڈ ٹوٹ گیا جہاں زیادہ سے زیادہ درجہ حرارت 41.2 ڈگری سینٹی گریڈ ریکارڈ کیا گیا۔ مغربی فرانس کے علاقے بوردو میں درجہ حرارت 41.9 ڈگری سینٹی گریڈ تک پہنچ گیا جس نےگزشتہ سال اگست میں قائم ہونے والا ریکارڈ توڑ دیا۔

فرانس میں شدید گرمی کے باعث کئی اسکول بندکر دیےگئے یا ان کے اوقات کار میں تبدیلی کر دی گئی، متعدد ٹرین سروسز بھی بند کردی گئیں۔ فرانس کے جنوب مشرقی شہر کارپانترا میں سخت گرمی میں گھر کے باہر کھڑی گاڑی میں دو بچے بے ہوش گئے، بچوں کی عمریں 2 اور 4 سال تھیں، امدادی کارکنوں نے انہیں بچانے کی بھرپور کوشش کی لیکن وہ جانبر نہ ہو سکے۔ حکام کا کہنا ہےکہ بچوں کی موت کی اصل وجہ کا تعین ابھی ہونا باقی ہے، تاہم شدید گرمی کو سب سے بڑا سبب سمجھا جا رہا ہے۔

اس کے علاوہ فرانس کے مختلف علاقوں میں تین بزرگ افراد بھی گرمی کی شدت سے جان کی بازی ہار گئے، جب کہ سوئمنگ پول اور دیگر پانی والی جگہوں پر نہاتے ہوئے 13 افراد ڈوب کر ہلاک ہوئے۔ حکام نے لوگوں کو ہدایت دی ہےکہ صرف نگرانی والے مقامات پر ہی تیراکی کریں۔ دوسری جانب برطانیہ کے محکمہ موسمیات نے پیش گوئی کی ہےکہ اس ہفتے جون کے مہینے کے درجۂ حرارت کے ریکارڈ بھی ٹوٹ سکتے ہیں۔انگلینڈ اور ویلز میں شدید گرمی کی ریڈ وارننگ جاری کی گئی ہے اور درجہ حرارت 38 درجےکو چھونےکا خدشہ ہے۔

ریڈ وارننگ کا مطلب ہے کہ یہ گرمی جان لیوا بھی ہوسکتی ہے۔ بجلی، روڈ اور ریلوے نظام متاثر ہوسکتا ہے۔ اسپین، اٹلی اور بیلجیئم میں بھی شدید گرمی کی وارننگ جاری کی گئی ہے۔

یو این آئی۔ ع ا۔

تہران، سوئٹزر لینڈ مذاکرات میں 12 ارب ڈالر کے منجمد اثاثوں کے اجرا کیلئے دستخط کو حتمی شکل دے دی گئی۔

ایرانی پارلیمنٹ کے اسپیکر محمد باقر قالیباف نے تصدیق کی ہے کہ سوئٹزرلینڈ میں ہونے والے مذاکرات میں 12 ارب ڈالر کے منجمد اثاثوں کے اجرا کے لیے دستخط کو حتمی شکل دے دی گئی۔

ایرانی مذاکراتی ٹیم کے سربراہ محمد باقر قالیباف اور وزیر خارجہ عباس عراقچی آبنائے ہرمز کے معاملے پر بات چیت کے لیے عمان پہنچ گئے۔

ایرانی پارلیمنٹ کے اسپیکر محمد باقر قالیباف نے اپنے بیان میں کہا ہے کہ آبنائے ہرمز میں جہازوں کی آمدورفت پر رابطے کا نظام قائم کرنے پر اتفاق کیا ہے۔اقدام کا مقصدکسی بھی قسم کے تصادم یا کشیدگی سے بچناہے۔ انہوں نے بتایا کہ سوئٹزرلینڈ میں ہونے والے مذاکرات میں 12 ارب ڈالر کے منجمد اثاثوں کے اجرا کے لیے دستخط کو حتمی شکل دے دی گئی۔

اسپیکر محمد باقر قالیباف کا کہنا تھا کہ سوئٹزرلینڈ مذاکرات کی بنیاد پر لبنان کی علاقائی سالمیت و خودمختاری کی ضمانت دینے پر اتفاق کیا ہے۔ واضح رہے کہ امریکا نے ایرانی تیل کی فروخت پر عائد پابندی اٹھالی ہے جس کے بعد2 ماہ تک ایران امریکا سمیت دنیا بھر میں اپنی پیٹرولیم مصنوعات فروخت کر سکے گا۔

ایران نے پابندیاں اٹھنے اور کچھ ایرانی اثاثے بحال ہونے کی تصدیق کر دی۔ امریکی وزیر خزانہ اسکاٹ بیسینٹ کا کہنا ہے کہ شمالی کوریا ، کیوبا اور یوکرین پر ایرانی تیل خریداری پر پابندی تاحال برقرار ہے۔

یو این آئی۔ ع ا۔