گراں فروشی کے خلاف عوامی مہم
علاقے میں دکانیں بند،سرکاری نرخنامے کے تحت ہی قیمتیں ادا کریں گے: سیول سوسائٹی

سرینگر: جموں وکشمیر کے گرمائی دارالحکومت سرینگر میں گراں فروشی کے خلاف عوامی سطح پر ایک مہم شروع ہو ئی ہے،جس کے تحت گوشت اور مرغ فروشوں کے خلاف بائیکاٹ کا آغاز ہوا۔

ڈلگیٹ سرینگر نے اس حوالے سے ایک مثال قائم کی ہے،جہاں کی سیول سوسائٹی نے اس عزم کا اعا دہ کیا ہے کہ وہ سر کاری نرخنامے کے تحت ہی گوشت اور مرغ کی قیمتیں ادا کریں گے،جسکی وجہ سے علاقے میں گوشت اور مر غ فروشوں کی دکانوں پر تالے ہیں۔

کشمیر نیوز سروس کے مطابق گوشت اور مرغ کی بے لگام قیمتوں اور ازخود قیمتوں میں اضافے کے خلاف سرینگر میں شہریوں نے ایک بیداری مہم شروع کی ہے۔اس مہم کا آغاز ڈلگیٹ سرینگر سے ہوا ہے،جہاں کی ’سینٹرل کارڈنیشن کمیٹی‘ نے اعلان کررکھا ہے کہ وہ گوشت اور مرغ کی قیمتیں سر کاری نرخنامے کے مطابق ہی ادا کریں گے۔

علاقہ مکین کے ذی حس طبقے نے یہ کمیٹی تشکیل دی ہے،جس کا واحد مقصد گراں فروشی کا قلع قمع اور سماجی برائیوں کا خاتمہ ہے۔مذکورہ کمیٹی کے صدر شوکت احمد اور جنرل سیکریٹری مزمل مقبول نے بتایا ’کچھ دن پہلے ایک سینٹرل کارڈنیشن کمیٹی ڈلگیٹ کی تشکیل ہوئی ہے اور اِس کمیٹی کا اولین مقصد ہمارے علاقہ ڈلگیٹ اور علاقہ کی عوام کی بہبودی اور اُن کے مسائل کا ترجیحی بُنیاد پر حل یقینی بنانا ہے‘۔

ان کا کہناتھا ’اس وقت جہا ں ایک طرف جس مہلک بیماری(کورونا وائرس) نے پوری دنیا کو اپنی لپیٹ میں لیا ہوا ہے اورپوری دُنیا کا کاروبار ٹھپ ہو کر رہ گیا۔ غریب جو کچھ دن میں کماتا ہے،اس پر گزارا کرتا تھا، لیکن وہ آج کل فاقہ کشی پر مجبور ہو گیا ہے، مشکل سے لوگوں کا گزارہ ہو پا رہا ہے، وہیں دوسری طرف ہماری وادی میں بشمول ہمارے علاقہ کے کچھ خودغر ض دکاندار صارفین کو دو دو ہاتھوں سے لوٹ رہے ہیں‘ان کا کہناتھا ’ہونا تو چاہیے تھا کہ آج کے اس مشکل وقت میں ہم ایک دوسرے کے کام آتے اور ایک دوسرے کا سہارا بنتے،جہاں تک مقامی انتظامیہ کا تعلق ہے اُنھوں نے بھی کھانے کی خوردنی کے لئے ایک مقررہ ریٹ لسٹ تیارکی تھی لیکن اس کے باوجود یہاں کے دُکاندار صارفین کو اپنے من چاہا داموں پر سامان بھیجتے رہتے ہیں‘۔

انہوں نے کہا ’ماہِ صیام کے مقدس مہینے اور عیدالفطر کے مُتبرک موقعے پر کچھ گراں فروش دُکانداروں جیسے دودھ والے، مُرغ فروش، سبزی فروش، قصاب وغیرہ نے بازار میں لوٹ کھسوٹ مچادی‘۔ان کا کہناتھا کہ ان عوام دشمن عناصرکو ہم نے پہلے بھی کئی بار آگاہ کیا تھا، مگر یہ لوگ پھر بھی اپنی حرکات سے باز نہیں آتے، چیزوں کے دام آسمان تک بڑھانے میں کوئی کثر اور کوئی موقعہ نہیں چھوڑتے‘۔

مذکورہ کمیٹی کے صدر شوکت احمد اور جنرل سیکریٹری مزمل مقبول نے مزید بتایا کہ ایسے عناصر سماج کے مجرم کہلائے جاتے ہیں جو مُصیبت کے ان ایام میں بھی امیر غریب کا امتیاز بالائے تاق رکھ کر اپنی من مانی سے اونچے دام بڑھاکر عوام کو فاقہ کشی پر مجبور کردیتے ہیں‘۔ انہوں نے کہا ’اس ضمن میں سینٹرل کارڈنیشن کمیٹی اور علاقہ ڈلگیٹ کی تمام مساجد کے ذی عزت ممبران و عہدیداران نے متفق ہوکربا اتفاق رائے یہ فیصلہ لیا کہ علاقہ ڈلگیٹ بے راہ روی، نشیلی ادویات، گراں فروشی اور کئی دیگر سماجی برائیوں کو ختم کرنے کیلئے ہر ممکنہ کوشش کرے گی اور ایسے عناصر کے خلاف ایک زوردار مہم کی شروعات ہوگی ہے‘۔

ان کا کہناتھا کہ اس مہم میں کمیٹی ضلع انتظامیہ اور علاقہ کی پولیس کو بھی ساتھ لے کر چل رہی ہے جبکہ وادی کشمیر کے دوسرے علاقوں میں اِن کے خلاف عوام نے مہم شروع کر دی ہے۔انہوں نے کہا کہ اِس ضمن میں کمیٹی نے کچھ دن پہلے سرفہرست علاقہ ڈلگیٹ کے قصابوں کو سرکارکی طے شُدہ ریٹ لِسٹ کے مُطابق گوشت فروخت کرنے پرآمادہ کرنے کی کوشش کی، مگر یہ قصاب پھر بھی اپنی ضِد چھوڑنے پر تیار نہیں، کمیٹی نے یہ فیصلہ طے پایا کہ جب تک کہ یہ قصاب کمیٹی کے فیصلے پر اپنی مہر نہ لگا دیں، تب تک یہ قصاب اپنی دُکانیں بند رکھیں گے، یاپھر گوشت کے علاوہ کوئی اور اشیاء فروخت کرسکتے ہی، تاہم اِن خودغرض عناصر نے دُکانیں بند رکھنے کو ترجیح دے کر اپنی من مانی کو ترک کرنے سے انکار کر دیا‘۔

ان کا کہناتھا کہ اسطرح ثابت کرنا چاہتے ہے کہ انہیں عوام کو پریشان کرنے میں کوئی حرج نہیں، علاقہ مکین نے یہ بھی فیصلہ کیا ہے وہ اب پوری طرح سے ایسے قصابوں کے ساتھ بائیکاٹ کریں گے۔ایک بیان میں کہا گیا ہے کہ سینٹرل کارڈنیشن کمیٹی ڈلگیٹ علاقہ کی مساجد اور محلہ ء کمیٹی سے التماس کرتی ہے کہ وہ جمعہ کی نماز کے خُطبے میں علاقہ ڈلگیٹ کی عوام سے فی الحال گوشت کابائیکاٹ کرنے کی اپیل کریں،جب تک یہ قصاب گوشت کو سرکار کی طے شُدہ قیمت 440 روپے فی کلو پرفروخت نہ کریں اور کمیٹی آپ سب کو یقین دلاتی ہے کہ کمیٹی بہت جلد ان قصاب کو مقررہ قیمت پر گوشت فروخت کرنے کے لئے راضی کرے گی۔