سرینگر، پیپلز ڈیموکریٹک پارٹی (پی ڈی پی ) کی صدر اور جموں و کشمیر کی سابق وزیر اعلیٰ محبوبہ مفتی نے وادی میں امن و امان کی بحالی اور نئے سرے سے مذاکرات کے آغاز کے لیے تمام سیاسی جماعتوں اور سول سوسائٹی کو متحد ہونے کی دعوت دی ہے انہوں نے جموں و کشمیر کے حقوق کے لیے تمام اسٹیک ہولڈرز پر زور دیا ہے کہ وہ باہمی اختلافات بھلا کر ایک مشترکہ وفد کی صورت میں وزیر اعظم نریندر مودی اور مرکزی وزیر داخلہ امت شاہ سے ملاقات کریں۔

محبوبہ مفتی نے یکم جون کو وزیر اعلیٰ عمر عبداللہ، بی جے پی رہنما اور اپوزیشن لیڈر سنیل شرما، جموں و کشمیر کانگریس کے صدر طارق حمید کرہ اور دیگر سیاسی و سماجی رہنماؤں کو الگ الگ خطوط ارسال کیے۔ اپنے خط میں انہوں نے لکھا کہ جموں و کشمیر ایک بار پھر تاریخ کے ایسے نازک موڑ پر کھڑا ہے جہاں عوام میں مایوسی اور بے چینی کی لہر دوڑ چکی ہے۔ان کا کہنا تھا کہ مرکز کے زیر انتظام علاقے (یو ٹی) کے عوام کی امنگوں، شکایات اور خدشات کو قومی سطح پر مؤثر انداز میں پہنچانے کے لیے ایک مشترکہ اور مربوط آواز کی اشد ضرورت ہے۔

پی ڈی پی سربراہ نے لداخ کی مثال دیتے ہوئے کہا کہ حال ہی میں ‘لیہہ ایپکس باڈی’ اور ‘کارگل ڈیموکریٹک الائنس’ نے جس طرح مرکز کے ساتھ مذاکرات میں کامیابی حاصل کی ہے، وہ ہمارے لیے ایک بڑا سبق ہے۔ اس سے یہ ثابت ہوتا ہے کہ بامقصد نتائج صرف اور صرف تعمیری بات چیت سے ہی حاصل کیے جا سکتے ہیں۔

یواین آئی ۔م اع

واشنگٹن، امریکی صدر ٹرمپ نے کہا ہے کہ اسرائیل کے وزیر اعظم نیتن یاہو کے ساتھ کال پر نتیجہ خیز بات ہوئی۔

ٹروتھ سوشل پر جاری بیان میں صدر ٹرمپ نے لکھا کہ اب اسرائیل کا کوئی فوجی دستہ بیروت نہیں جائے گا اور اسرائیل کے جو بھی فوجی دستے راستے میں تھے وہ واپس لوٹ گئے ہیں۔

ٹرمپ نے کہا کہ اعلیٰ سطح نمائندوں کے ذریعےحزب اللہ کیساتھ بھی اچھی بات چیت ہوئی، حزب اللہ نے اس بات پر اتفاق کیا ہے کہ تمام فائرنگ بند ہو جائے گی اسرائیل ان پر حملہ نہیں کرے گا اور وہ بھی نہیں کریں گے۔

اس سے قبل این بی سی نیوز سے گفتگو کرتے ہوئے صدر ٹرمپ نے کہا کہ ایرانی کی جانب سے مذاکرات معطل کرنے کی کوئی اطلاع نہیں ملی، ایرانی خاموشی پر کوئی اعتراض نہیں ہم انتظار کرنے کے لیے تیار ہیں۔ امریکی صدر نے کہا کہ ایران نے مذاکرات کی معطلی سےمتعلق ہمیں باقاعدہ مطلع نہیں کیا اور مذاکرات معطلی کا یہ مطلب ہرگز نہیں کہ ہم وہاں بمباری شروع کر دیں گے۔ صدر ٹرمپ نے واضح کیا کہ ایران کے خلاف بحری ناکہ بندی بدستور برقرار رکھی جائے گی۔

ایرانی میڈیا نے دعویٰ کیا ہے کہ ایران نے احتجاجاً امریکا کے ساتھ پیغامات کا تبادلہ روک دیا ہے۔ ایرانی میڈیا کے مطابق حکام نے غزہ اور لبنان میں اسرائیلی فوجی کارروائیوں کی مذمت کرتے ہوئے لبنان کے مقبوضہ علاقوں سے اسرائیل کے مکمل انخلا کا مطالبہ کیا ہے۔ ایرانی حکام کا کہنا ہے موجودہ صورتحال میں مذاکرات کا امکان نہیں، اسرائیل اور اس کے حامیوں کو جوابدہ بنایا جائے گا۔ ایرانی میڈیا کا کہنا ہے کہ اب آبنائے ہرمز مکمل طور پر بند کرنے کا فیصلہ کر لیا گیا اور باب المندب سمیت دیگر تمام محاذ فعال کرنے کا فیصلہ کیا گیا ہے۔

یو این آئی۔ ع ا۔

تل ابیب، اسرائیلی وزیراعظم نیتن یاہو نے کہا ہے کہ اسرائیلی فوج جنوبی لبنان میں منصوبے کے مطابق اپنی کارروائیاں جاری رکھے گی۔

نیتن یاہو نے سوشل میڈیا پلیٹ فارم ایکس پر جاری بیان میں کہا کہ انہوں نے امریکی سابق صدر ڈونلڈ ٹرمپ کو واضح طور پر آگاہ کیا ہے کہ اگر حزب اللہ نے اسرائیلی شہروں اور شہریوں پر حملے بند نہ کیے تو اسرائیل بیروت میں دہشت گرد اہداف کو نشانہ بنائے گا۔

اسرائیلی وزیر اعظم نے کہا کہ ہمارا یہ مؤقف تبدیل نہیں ہوا، اسرائیلی فورسز جنوبی لبنان میں طے شدہ منصوبے کے مطابق کارروائیاں جاری رکھیں گی۔

واضح رہے کہ ایران کی طرف سے امریکہ سے رابطے معطل کرنے کے بعد امریکی صدر ٹرمپ نے نیتن یاہو سے ہنگامی رابطہ کیا تھا اور ٹرمپ نے لبنان میں اسرائیلی کارروائیاں روکنے کا اعلان کیا تھا۔ ٹروتھ سوشل پر اپنے بیان میں ٹرمپ نے کہا کہ بیروت کی جانب کوئی فوج نہیں بھیجی جائے گی اور جو فوجی دستے روانہ ہوچکے ہیں انہیں واپس موڑ دیا گیا ہے۔

انہوں نے مزید کہا کہ اعلیٰ سطح کے نمائندوں کے ذریعے ان کا حزب اللہ کے ساتھ بھی بہت اچھا رابطہ ہوا، جس میں جنگ بندی پر اتفاق کیا گیا ہے۔ ٹرمپ کے مطابق اس مفاہمت کے تحت اسرائیل حزب اللہ پر حملہ نہیں کرے گا اور حزب اللہ بھی اسرائیل پر حملہ نہیں کرے گی۔

یو این آئی۔ ع ا۔