خبر اردو

جنوبی کشمیر اننت ناگ کے بونہ پورہ مونیواڑ کھنہ بل علاقے میں منگل اور بدھ کی در میانی شب کو فوج اور فورسز نے مشترکہ طور پر ایک مصدقہ اطلاع کی بنیاد پر علاقے کا سخت محاصرا عمل میں لایا ۔اس دوران فورسز نے علاقے میں چھپے بیٹھے جنگجوؤں کو ڈھو نڈ نکالنے کی خاطر بڑے پیمانے پر تلاشی آپریشن شروع کر دیا ۔ فورسز کی تلاشی پارٹی جوں ہی مشتبہ مکان کے نزدیک پہنچی تو اس دوران یہاں چھپے بیٹھے جنگجوؤں نے فورسز پر شدید فائرنگ کی جس کے ساتھ ہی جھڑپ کا با ضابطہ آغاز ہو گیا ۔انہوں نے بتایا کہ بدھ کی صبح 5بجے سے ہی فوج اور جنگجوؤں کے مابین وقفے وقفے سے گولہ باری کا سلسلہ جاری رہا جس کے نتیجے میں بنہ پورہ مو نیواڑ اور اس کے ملحقہ علاقوں میں مکمل طور پر سکوت چھایا رہا۔انہوں نے بتایا کہ دن چڑھنے کے ساتھ ہی فورسز نے اپنی کاروائی میں تیزی لاتے ہو ئے کھنہ بل اور اس کے ملحقہ علاقوں میں خار دار تاریں بچھا کر جنگجوؤں کے خلاف فیصلہ کن آپریشن شروع کر دیا ۔انہوں نے بتایا کہ اس دوران فورسز کی بکتر بند گاڑیوں نے مکان کے نزدیک جاکر بارودی مواد نصب کر کے مکان کو زمین بوس کر دیا ۔انہوں نے بتایا کہ بعد میں فورسز نے مکان کے ملبے سے 2جنگجوؤں کی لاشیں بر آمد کی جن میں حز ب المجاہدین کے سرکردہ اور دیرینہ کمانڈر الطاف احمد ڈار عرف کاچرو، معین ولد مر حوم غلام محمد ڈار ساکنہ ہاوورہ مشی پورہ اور ان کے ساتھ عمر رشید وانی ساکنہ کھڈ ونی شامل ہیں

اس دوران پولیس نے جھڑپ کے حوالے سے اپنے بیان میں کہا کہ منگل اور بدھ کی در میانی شب کو فوج اور ایس او جی و سی آر پی ایف کی مشترکہ جمعیت نے ایک مصدقہ اطلاع کی بناء پر بنہ پورہ مو نیواڑ کا محاصرا عمل میں لایا جس کے دوران جو ں ہی فورسز اہلکاروں نے مشتبہ مکان کی جانب پیش قدمی کی تو یہاں پناہ لئے ہو ئے جنگجوؤں نے فورسز پارٹی پر جدید ہتھیاروں سے فائرنگ کی جس کے ساتھ ہی جھڑپ کا آغاز ہو گیا ۔انہوں نے بتایا کہ جھڑپ کے اختتام پر فورسز اہلکاروں نے مکان کے ملبے سے 2جنگجوؤں کی لاشیں بر آمد کی جن میں حزب المجاہدین کا سرکردہ اور دیرینہ کمانڈر الطاف احمد ڈار عرف کاچرو عرف معین شامل ہیں ۔انہوں نے بتایا جھڑپ میں جارا گیا دوسرا جنگجو عمر رشید وانی ساکن کھڈونی گزشتہ سال سے عسکری محاذپر سرگرم تھا جس دوران انہوں نے سیکورٹی فورسز اور عام شہریوں پر حملے انجام دیے۔ انہوں نے بتایا کہ عمر رشید وانی سرینگر اور اننت ناگ میں فورسز اہلکاروں پر ہوئے حملوں میں براہ راست ملوث تھا جبکہ مہلوک حال ہی میں سرینگر کے بتہ مالو علاقے میں ایک جھڑپ کے دوران سیکورٹی فورسز کو چکمہ دے کر فرار ہوا تھا۔ انہوں نے بتایا کہ مارے گئے جنگجوؤں سے ہتھیار اور دیگر نوعیت کا گولہ بارود بھی ضبط کیا گیا۔

اس دوران جھڑپ کی خبر پھیلتے ہی بدھ کی صبح سے ہی مونیوار اور ملحقہ علاقوں میں فورسز کے کڑے پہرے کے باوجود نوجوانوں کی مختلف ٹولیوں نے سڑکیوں پر آکر احتجاج کرتے ہوئے زور دار نعرے بازی کی۔ نمائندے نے بتایا کہ نوجوانوں کی مختلف ٹولیوں نے جھڑپ کے مقام کی جانب پیش قدمی کرنے کی کوشش کرتے ہوئے یہاں تعینات فورسز اہلکاروں سے چاروں اطراف سے سنگ باری کی جس کے نتیجے میں یہاں انتہائی کشیدگی دیکھنے کو ملی۔ ادھر فورسز اہلکاروں نے مظاہرین کو منتشر کرنے کی غرض سے آنسو گیس کے درجنوں گولے اور پیلٹ فائرنگ کا استعمال کیا جس کے نتیجے میں 80افراد زخمی ہوگئے جنہیں مختلف ہسپتالوں میں علاج و معالجے کی خاطر داخل کرایا گیا۔ نمائندے کے مطابق فورسز کی جوابی کارروائی کے نتیجے میں 5نوجوانوں کی آنکھوں پر پیلٹ کے چھرے پیسوست ہوئے جن کو نازک حالت میں سرینگر کے ایس ایم ایچ ایس ہسپتال منتقل کردیا گیا جہاں اُن کا علاج و معالجہ جاری ہے۔اس دوران انتظامیہ نے جنوبی کشمیر کے کولگام اور انت ناگ میں امن و قانون کی صورتحال کو برقرار رکھنے کے لیے دوران شب ہی موبائل انٹرنیٹ سروس کو معطل کردیا ۔ انتظامیہ کے ایک افسر نے بتایا کہ مونیوار کھنہ بل میں جھڑپ کے پیش نظر انتظامیہ نے اگلے احکامات تک موبائل انٹرنیٹ سروس کو معطل رکھنے کا فیصلہ کیا ہے۔ ادھر احتجاجی مظاہروں کے پیش نظر ریل حکام نے بھی سرینگر سے بانہال تک ریل سروس کو اگلے احکامات تک معطل رکھنے کا فیصلہ یا۔

ذرائع نے بتایا کہ محکمہ ریلوے نے احتجاجی مظاہروں کے خدشے کے پیش نظر اور مسافروں کے سلامتی کے حوالے سے جنوبی کشمیر میں ریل سروس کو حالت میں سدھار آنے تک معطل رکھنے کا فیصلہ کیا۔ ادھر مہلوک جنگجوؤں کی نعشوں کو جونہی اپنے آبائی علاقے کھڈونی اورہاوؤرہ پہنچایا گیا تو یہاں لوگوں نے سڑکوں کا رخ کرتے ہوئے زبردست احتجاجی مظاہرے کئے۔ نمائندے نے بتایا کہ کھڈونی اور ہاؤورہ میں بدھ کی صبح سے ہی حالات کشیدہ رہے جس دوران یہاں تجارتی، تعلیمی اور عوامی سرگرمیاں ٹھپ ہوکر رہ گئیں۔ انہوں نے بتایا کہ مونیوار جھڑپ میں پھنسے جنگجوؤں کی خبر بدھ کی صبح جونہی آبائی علاقوں میں پہنچی تو یہاں نوجوانوں کی مختلف ٹولیوں نے احتجاجی مظاہرے کئے جس دوران یہاں ٹریفک کی نقل و حمل مکمل طور پر بند ہوگئی۔ انہوں نے بتایا کہ اس موقعے پر نوجوانوں نے یہاں تعینات فورسز اہلکاروں پر سنگ باری کی جس کے بعد یہاں تناؤ میں مزید شدت بڑھ گئی۔ ادھر سہ پہر کو جونہی جنگجوؤں کی نعشیں اپنے آبائی علاقوں کو پہنچائی گئی تو یہاں کہرام مچ گیا جس دوران لوگوں نے اسلام و آزادی کے حق میں زور دار نعرے بازی کی۔

ذرائع سے معلوم ہوا ہے کہ اس دوران جاں بحق جنگجوؤں کو خراج عقیدت ادا کرنے کے لیے جنگجوؤں کی ایک بڑی تعداد جلوس جنازہ میں شامل ہوئی جنہوں نے ہوا میں گولیوں کے کئی راؤنڈ فائر کرتے ہوئے مہلوک ساتھیوں کو سلامی پیش کی۔اس دوران حزب المجاہدین کے سربراہ سید صلاح الدین اور ڈپٹی سپریم کمانڈر سیف اللہ خالد سمیت فیلڈ آپریشنل کمانڈر محمد بن قاسم نے جاں بحق جنگجوؤں کو خراج عقید ت ادا کیا۔ انہوں نے بتایا کہ کمانڈر الطاف احمد ڈار عرف کاچرو اور عمر رشید وانی کو خراج عقیدت ادا کرتے ہوئے کہا کہ نوجوانوں کا یہ گرم گرم لہو ایک دن ضرور انقلاب برپا کرے گا اور غلامی کا دور اپنے اختتام کو پہنچ جائے گا۔ ڈپٹی سپریم کمانڈر سیف اللہ خالد اور فیلڈ آپریشنل کمانڈر محمد بن قاسم نے بھی اپنے پیغامات میں شہداء کو خراج عقیدت پیش کرتے ہوئے کہا کہ دونوں شہیدوں نے اپنی زندگیاں اسلام کے مطابق گذاری اور اپنا مقدس لہو تحریک آزادی پر قربان کرکے ایک نئی تاریخ رقم کی۔ انشاء اللہ ان قربانیوں کے طفیل ہی ہماری محکوم و مظلوم قوم بھارتی تسلط سے آزاد ہوگی۔KNS