نئی دہلی، لوک سبھا میں اپوزیشن لیڈر راہل گاندھی نے نیٹ یو جی 2026 امتحان کی منسوخی پر مرکزی حکومت کی سخت مذمت کی ہے اور کہا ہے کہ حکومت نے 22 لاکھ سے زائد طلبہ کی محنت پر پانی پھیر دیا ہے۔

مسٹر گاندھی نے سوشل میڈیا پر جاری کردہ ایک بیان میں کہا، “کسی باپ نے بچوں کی پڑھائی کے لیے قرض لیا، کسی ماں نے زیورات بیچے اور لاکھوں طلبہ نے راتوں کو جاگ کر تیاری کی، لیکن بدلے میں انہیں ‘پیپر لیک، حکومتی غفلت اور تعلیم میں منظم بدعنوانی’ ملی۔ یہ محض ناکامی نہیں بلکہ نوجوانوں کے مستقبل کے ساتھ کھلواڑ ہے۔ ہر بار پیپر مافیا بچ نکلتے ہیں اور ایماندار طلبہ اس کا خمیازہ بھگتتے ہیں۔” انہوں نے کہا کہ امتحان کی منسوخی کی وجہ سے لاکھوں طلبہ کو دوبارہ ذہنی تناؤ، معاشی بوجھ اور غیر یقینی صورتحال کا سامنا کرنا پڑے گا۔ انہوں نے سوال کیا کہ اگر طلبہ کی تقدیر محنت سے نہیں بلکہ “پیسے اور رسوخ” سے طے ہوگی تو نظام تعلیم کا کیا فائدہ رہ جائے گا۔

کانگریس لیڈر نے وزیر اعظم نریندر مودی کو نشانہ بناتے ہوئے کہا، “وزیر اعظم کا نام نہاد امرت کال ملک کے لیے وش کال (زہریلا دور) بن گیا ہے۔” واضح رہے کہ مرکزی حکومت نے نیٹ یو جی 2026 امتحان کو منسوخ کرنے کا فیصلہ کیا ہے۔

امتحان منعقد کرنے والی نیشنل ٹیسٹنگ ایجنسی (این ٹی اے) نے ایک بیان جاری کرتے ہوئے کہا ہے کہ مرکزی حکومت کی منظوری کے بعد امتحان منسوخ کر دیا گیا ہے اور نئی تاریخوں کا اعلان جلد کیا جائے گا۔

یواین آئی ۔ایف اے

نئی دہلی، نیشنل ٹیسٹنگ ایجنسی (این ٹی اے) نے منگل کو نیشنل ایلیجیبلٹی کم انٹرنس ٹیسٹ-یو جی 2026 (نیٹ-یو جی) کا امتحان منسوخ کرنے کا اعلان کیا ہے این ٹی اے کی جانب سے منگل کو جاری ایک بیان میں بتایا گیا کہ ایجنسی نے مرکزی حکومت کی منظوری سے تین مئی کو منعقدہ نیٹ (یو جی) 2026 امتحان کو منسوخ کرنے اور اسے دوبارہ منعقد کرنے کا فیصلہ کیا ہے۔ امتحان کی نئی تاریخوں کا اعلان الگ سے کیا جائے گا۔ امتحان میں ہونے والی بے ضابطگیوں کی خبروں کے بعد ایجنسی نے آٹھ مئی کو اس معاملے کو آزادانہ تحقیقات اور ضروری کارروائی کے لیے مرکزی ایجنسیوں کے سپرد کر دیا تھا۔ مرکزی ایجنسیوں کی تحقیقات کی بنیاد پر موصول ہونے والی معلومات کے بعد این ٹی اے نے امتحان منسوخ کرنے کا فیصلہ کیا ہے۔ حکومتِ ہند نے اس معاملے میں لگائے گئے الزامات کی جامع تحقیقات کے لیے کیس کومرکزی تحقیقاتی بیورو (سی بی آئی) کے سپرد کرنے کا بھی فیصلہ کیا ہے۔

یواین آئی۔ایف اے

نئی دہلی، عام آدمی پارٹی (عآپ) کے قومی کنوینر اروند کیجریوال نے کہا ہے کہ وزیر اعظم نریندر مودی کو اس بارے میں صورتحال واضح کرنی چاہیے کہ اس وقت ملک کی معیشت کیسی ہے اور ایک سال بعد معیشت کیسی رہنے والی ہے مسٹر کیجریوال نے منگل کو یہاں پریس کانفرنس میں کہا کہ مغربی ایشیا کے بحران کا اثر پوری دنیا پر ہے لیکن وزیر اعظم نے جس طرح ہم وطنوں سے سات مطالبات کیے ہیں، اس طرح کے اقدامات کسی ملک نے نہیں اٹھائے۔ انہوں نے کہا کہ مسٹر مودی نے جو تمام اقدامات اٹھائے ہیں اس سے متوسط طبقہ متاثر ہوا ہے۔ وزیر اعظم نے صرف متوسط طبقے سے ہی قربانی دینے کی اپیل کی ہے جو کہ انتہائی افسوسناک ہے۔ اگر سب سے زیادہ قربانی دینی تھی تو حکومت کو اپنے اخراجات میں کٹوتی کرنی چاہیے تھی لیکن اس نے کوئی کٹوتی نہیں کی ہے۔

انہوں نے کہا کہ ملک کے لیے جو کچھ بھی کرنے کی ضرورت ہے وہ سب کرنے کے لیے تیار ہیں لیکن صرف متوسط طبقے کو نشانہ نہ بنایا جائے۔ مسٹر کیجریوال نے ایک سوال کے جواب میں کہا کہ نیٹ پیپر لیک لوگوں کے ساتھ دھوکہ ہے۔ انہوں نے کہا کہ اب تک چار بار نیٹ پیپر لیک ہو چکا ہے۔ اس سے ثابت ہوتا ہے کہ بڑے پیمانے پر کوئی ملی بھگت ہے۔ انہوں نے کہا کہ جو پیپر لیک نہیں روک سکتے وہ حکومت کیا چلائیں گے۔ حکومت لاکھوں بچوں کے مستقبل کے ساتھ کھلواڑ کر رہی ہے۔ انہوں نے حکومت کے خلاف عوامی تحریک کے لیے سڑکوں پر نکلنے کی اپیل کی۔

قابل ذکر ہے کہ وزیر اعظم نے حال ہی میں لوگوں سے پیٹرول اور ڈیزل کی کھپت کم کرنے کے لیے میٹرو، الیکٹرک بسوں اور عوامی نقل و حمل کے زیادہ استعمال کی ترغیب دی ہے۔ ساتھ ہی کار پولنگ، ورچوئل میٹنگز اور ورک فرام ہوم کو فروغ دینے کی بھی اپیل کی۔ انہوں نے زرمبادلہ بچانے کے لیے خوردنی تیل کی کھپت کم کرنے اور بحران کے وقت سونے کی خریداری ٹالنے کی بھی اپیل کی۔

یواین آئی۔ایف اے