جموں وکشمیر میں کورونا سے متعلق اموات کی تعداد بڑھ ک 115تک ہوگئی
خبراردو:-
سرینگر: جموں وکشمیر میں کورونا وائرس کی قہر ساما نیاں جاری رہنے کے بیچ وادی کشمیر کے صورہ میڈیکل انسٹی چیوٹ،صدر اسپتال اور سی ڈی اسپتال میں کورونا وائرس اور دیگر امراض میں مبتلاء سرینگر،کولگام،شوپیان، سوپور اور بڈگام سے تعلق رکھنے والے زیر علاج8مریضوں کی موت ہوگئی۔

اس طرح جموں وکشمیر میں کورونا سے متعلق اموات کی تعداد بڑھ کر115ہوگئی۔وادی کشمیر میں 100کا ہندسہ عبور ہوچکا ہے اور یہاں اب102ہلاکتیں ہوئیں جبکہ جموں میں یہ تعداد13ہے۔کشمیر نیوز سروس کے مطابق جموں کشمیر میں مزید 8 افراد کورونا وائرس کی وجہ سے جاں بحق ہوگئے۔

وادی میں صورہ میڈیکل انسٹی چیوٹ میں 4 اورایس ایم ایچ ایس (صدر اسپتال) میں جمعرات کے روز3مریضوں کی موت ہوئی جبکہ سی ڈی اسپتال میں ایک مریض کی موت ہوئی۔ جمعرات کی صبح ہونے والی پہلی 2کورونا ہلاکتیں کولگام کے ہٹی پوری اور بارہمولہ کے ایک شہری کی تھیں جبکہ دوسری 2ہلاکتیں بٹہ مالو سرینگر اور بڈگام کے شہریوں کی تھیں جبکہ بعد ازاں مزید4افراد کی موت ہوگئی۔

تفصیلات کے مطابق ایس ایم ایچ ایس اسپتال کے میڈیکل سپرانٹنڈنٹ،ڈاکٹر نذیر چوہدری نے بتایا کہ ضلع سرینگر کے بٹہ مالو علاقے سے تعلق رکھنے والی65 سالہ خاتون اور ضلع بڈگام سے تعلق رکھنے والے 75سالہ مریض جن کا کورونا ٹیسٹ جمعرات کو مثبت آیا، کی موت بدھ کی رات ہوئی تھی۔انہوں نے کہا کہ دونوں مریض نمونیا اور ہائپر ٹینشن کے علاوہ دیگر کئی امراض میں مبتلا تھے۔

انہوں نے کہا کہ دونوں کو بدھ کے روز یہاں داخل کیا گیا تھا۔ اس سے قبل جنوبی کشمیر کے ضلع کولگام اور شمالی کشمیر کے ضلع بارہمولہ سے تعلق رکھنے والے 2مریضوں کی صورہ میڈیکل میں موت ہوئی تھی۔سکمز کے میڈیکل سپرانٹنڈنٹ،ڈاکٹر فاروق جان نے ان اموات کی تصدیق کرتے ہوئے کہا کہ کولگام کے یاری پورہ علاقے سے تعلق رکھنے والے55 سالہ کورونا متاثرہ مریض کو یہاں 22 جون کو لایا گیا تھا اور جمعرات کے روز دن کے قریب سوا 12بجے اس کی موت ہوئی۔انہوں نے کہا کہ متوفی ہائپر ٹینشن کے علاوہ بھی کئی امراض میں مبتلا تھا۔موصوف ڈاکٹر نے کہا کہ بارہمولہ سے تعلق رکھنے والے 65 سالہ مریض کو یہاں دس روز قبل لایا گیا تھا اور جمعرات کو اس کی یہاں حرکت قلب بند ہونے سے موت ہوئی۔

انہوں نے کہا کہ متوفی بھی ہائپر ٹینشن اور دوسرے امراض میں مبتلا تھا۔جمعرات کو بعد دوپہر اُس وقت پانچویں موت ہوئی جب کولگام کے65سالہ شہری کی موت صورہ میڈیکل انسٹی چیوٹ میں ہوا۔مذکورہ مریض کا بھی کورونا ٹیسٹ مثبت آیا۔صورہ میڈیکل انسٹی چیوٹ کے سپر انٹنڈ نٹ،پروفیسر فاروق جان نے کہا کہ تاریگام کولگام کے مذکورہ مریض کو23جون کو اسپتال میں داخل کیا گیا تھا۔ان کا کہناتھا کہ مریض کو جی ایم سی اننت ناگ سے یہاں منتقل کیا گیا تھا۔مریض مختلف امراض میں مبتلاء تھا ور 2بجکر30منٹ پر انتقال کرگیا۔

دن کی چھٹی موت صدر اسپتال سرینگر سے رپورٹ ہوئی۔ذرائع کا کہنا ہے کہ کولگام کے شہری کی صدر اسپتال سرینگر میں جمعرات کو موت ہوئی اور وہ کورونا پازیٹیو تھا۔صدر اسپتال کے میڈیکل سپر انٹنڈنٹ،ڈاکٹر نذیر چودھری نے بتایا کہ کولگام کے شہری کو 30جون کو اسپتال میں داخل کیا گیا تھا اور وہ کئی امراض میں مبتلاء تھا اور جمعرات کو اسپتال میں اُسکی موت ہوئی۔دن کی 7ویں موت سی ڈی اسپتال سے رپورٹ ہوئی ہے۔معلوم ہوا ہے کہ حبہ کدل سرینگر کا60سالہ شہری کی کووڈ۔ 19کیلئے مخصوص اسپتال سی ڈی اسپتال ڈلگیٹ سرینگر میں موت ہوئی۔

اسپتال کے میڈیکل سپر انٹنڈنٹ ڈاکٹر سلیم ٹاک نے تصدیق کرتے ہوئے کہا کہ مریض کو اسپتال میں 29جون کو داخل کیا گیا تھا۔مریض ذیابطیس، نمونیا اور ہائپر ٹینسیو امراض میں مبتلاء تھا اور یہ کورونا پازیٹیو مریض تھا جسکی موت جمعرات کو ہوگئی۔سہ پہر پانچ بجے کے قریب سکمز صورہ میں زیر علاج اور ایک کورونا مریض کی موت واقع ہوئی۔

سکمز کے سپر انٹنڈنٹ پروفیسر فاروق جان نے بتایا کہ نادی گام شوپیاں کا 65سالہ شخص کورونا سے جاں بحق ہوا ہے۔ انہوں نے کہاکہ مذکورہ شخص کو یکم جولائی کے روز اسپتال میں بھرتی کیا گیا۔ انہوں نے کہاکہ مذکورہ شخص کئی امراض جن میں نمونیا شامل ہیں کا شکار تھا۔ یہ دن کے دوران ہونے والی آٹھویں کورونا ہلاکت تھی۔قابل ذکر ہے کہ کورونا کے متاثرین میں بے تحاشہ اضافے کی وجہ سے عوامی حلقوں میں شدید تشویش پائی جارہی ہے۔جمعرات کو وادی کشمیر میں ہوئی8اموات کیساتھ ہی جموں و کشمیر میں کورونا سے متعلق اموات کی مجموعی تعداد بڑھ کر115 ہوگئی۔ان اموات میں سے102کا تعلق کشمیرجبکہ13کا تعلق صوبہ جموں سے رکھتے ہیں۔

وادی کشمیر میں ضلع سرینگر میں اب تک کورونا سے متعلق سب سے زیادہ27 اموات درج ہوئی ہیں اور دوسرے نمبر پر ضلع بارہمولہ ہے جہاں اب تک18 افراد کی اس وائرس میں مبتلا ہو کر موت ہوئی ہے۔ضلع کولگام میں 16، شوپیاں میں 13، اننت ناگ میں 9، بڈگام میں 8، کپوارہ میں 6، پلوامہ میں 4 اور بانڈی پورہ میں ایک مریض کورونا میں مبتلا ہوکر زندگی کی جنگ ہارگیا ہے۔

جموں وکشمیر میں کورونا متاثرین کی تعداد میں بھی مسلسل اضافہ ہورہا ہے۔