خبراردو:

حیدرپورہ میں حریت اکائیوں کے سربراہوں یا ان کے نمائندوں بشمول امیرِ حمزہ شاہ، مولوی بشیر عرفانی، سید محمد شفیع، محمد رفیق اویسی، محمد مقبول ماگامی، امتیاز احمد شاہ، رمیز راجہ، شکیل احمد بٹ، محمد امین بٹ، عمران احمد بٹ کے علاوہ سینکڑوں کارکنوں، عام نوجوانوں اور بزرگوں نے شرکت کی اور بڈگام میں آغا سید عقیل موسوی کی قیادت میں احتجاجی جلوس نکالا گیا، جبکہ اس جلوس کی قیادت آغا سید حسن الموصوی الصفوی کرنے والے تھے، مگر پولیس نے ان کو آج علی الصبح اپنے گھر میں نظربند کردیا۔ اس موقع پر حریت قائدین نے خطاب کرتے ہوئے کہا کہ بھارت کے حکمران یہاں کے عوام کی مبنی برحق جدوجہد کو کمزور کرنے کے لیے تمام اخلاقی اور انسانی ضابطوں کو بالائے طاق رکھ کر یہاں کے نہتے عوام کے خلاف برسرِ جنگ ہوگئی ہے۔ انہوں نے آزادی پسند راہنما راہنما محمد یٰسین ملک سمیت دوسرے راہنماؤں کو بدنام زمانہ قانون PSAکے تحت گرفتار کرنے کی کارروائیوں کی شدید الفاظ میں مذمت کرتے ہوئے کہا کہ بھارت کے حکمرانوں کو یہاں کی آزادی پسند قیادت سے اس قدر خوف طاری ہے کہ وہ ان کے ساتھ جمہوری طور مقابلہ کرنے کی ہمت نہیں کرپا رہا ہے، اسی لیے وہ یہاں کی آزادی پسندوں کو جیلوں میں بھر کر اپنی نام نہاد جمہوریت کو بے نقاب کررہا ہے۔

حریت راہنماؤں نے جماعت اسلامی جموں کشمیر کو غیر قانونی قرار دے کر اس پر پابندی عائد کرنے کی سخت ترین الفاظ میں مذمت کرتے ہوئے کہا کہ جماعت کے دفاتر کو سربمہر کرکے اُن کے قائدین اور کارکنوں کو ریاست سے باہر جیلوں میں منتقل کرکے بھارت کی طاقتیں اُس بوکھلاہٹ اور بیمار ذہنیت کا کھلا ثبوت فراہم کرتی ہیں، جن کے ذریعے وہ یہاں کسی بھی حق پسند شخص کو برداشت کرنے کا مادہ کھو چکی ہے۔ انہوں نے کہا کہ فلاحی اور دینی اداروں پر شکنجہ کسنے سے بھارتی حکمران اپنے لیے صرف نفرت کے بیچ بورہے ہیں اور ان مذموم حربوں سے یہاں کی اکثریت کو ایک واضح اور غیر مبہم پیغام مل رہا ہے کہ غاصب اور قابض طاقتوں کا ہر جگہ مزاج یکساں ہوتا ہے اور وہ کبھی بھی اخلاقی، جمہوری اور انسانی قدروں کو خاطر میں نہیں لاتا ہے۔

حریت قائدین نے کہا کہ ریاست جموں کشمیر کے مسلم اکثریتی کردار کو ختم کرنے کے لیے بھارت ہماری حقِ خودارادیت کی تحریک کو کمزور کرنے کے لیے مختلف منصوبوں پر عمل کرنے کی ناکام کوششوں میں لگا ہوا ہے، جس کے لیے سب سے پہلے بھارتی آئین کے علاوہ ریاست جموں کشمیر کے آئین میں ان تمام رُکاوٹوں کو دور کرنے کے لیے دفعہ 35A کو منسوخ کرنے کے لیے سپریم کورٹ کو استعمال میں لایا جارہا ہے۔ احتجاجی مظاہرہ میں شریک قائدینِ حریت نے اس موقع پر اس عہد کا اعادہ کیا کہ بھارت کی طرف سے یہاں کی آبادی کا تناسب تبدیل کرکے اِسے ایک ہندو راشٹریہ کے زیرِ تسلط لائے جانے کے مذموم ہتھکنڈوں کو خاک میں ملانے کے لیے کوئی بھی قربانی دینے سے دریغ نہیں کریں گے۔

حریت راہنماؤں نے NIAکی طرف سے قیادت، ان کے رشتہ داروں اور یہاں کے عام لوگوں کے گھروں پر چھاپوں اور تلاشی کارروائیوں کو شدید تنقید کا نشانہ بناتے ہوئے کہا کہ یہ کشمیری قوم کو ہراساں کرنے کی ایک مذموم کوشش ہے، لیکن ایسے حربوں سے یہاں کے لوگ اپنے حق سے دستبردار نہیں ہوسکتے۔

حریت قائدین نے غاصب طاقتوں کی طرف سے انتہا درجے کی اس بربریت اور جبر کے خلاف پوری قوم کو صف آراء ہونے کی دردمندانہ اپیل کرتے کہا کہ اگر اس ظلم اور اپنے بنیادی حقوق پر اس طرح کا شب وخون ٹھنڈے پیٹوں برداشت کرنے کی روایت قائم کی گئی تو وہ دن دور نہیں جب یہاں کی پوری آبادی کو اسرائیلی طرز پر اپنی ہی بستیوں سے خالی کرکے یہاں غیر ریاستی لوگوں کو بسانے کا عمل شروع کیا جائے گا اور اُس وقت ہم چاہتے ہوئے بھی اس کے خلاف کچھ کرنے کی پوزیشن میں نہیں ہوں گے۔