خبراردو:

جماعت اسلامی نے جموں مسلمانوں پر حملوں کو گہری سازش قرار دیتے ہوئے کہا کہ میں جموی مسلمانوں کو ڈرانے اور خوفزدہ کرنے اور اُن کے جان و مال کو نقصان پہنچانے کی خاطر وہاں کی فرقہ پرست قوتوں نے جس طرح کا ماحول کھڑا کرکے چن چن کر مسلمان بستیوں اور مساجد کو اپنا نشانہ بنایا اور اس لاقانونیت اور صریح غنڈہ گردی کو رُکوانے کے بجائے وہاں کی پولیس نے تماشائی کا جو رول ادا کیا وہ ہر صورت میں قابل مذمت ہے اور اس سے واضح ہوتا ہے کہ یہاں کے سنگھاسن اقتدار پر براجمان لوگ کھل کر مسلم دشمنی کامظاہرہ کررہے ہیں۔

پولیس کی نظروں کے سامنے درجنوں گاڑیوں کو نذر آتش کرکے خاک میں تبدیل کیا گیا اور مسلمانوں کی بستیوں اور مساجد کو پتھر بازی کا نشانہ بنایا گیا لیکن پولیس بلوائیوں کو رکوانے کے بجائے انہیں فساد برپا کرنے کی کھلی چھوٹ دیتے نظر آتی ہے۔ کئی مقامات پر اپنی جائیداد کی حفاظت کی خاطر جمع مسلمانوں کی بھیڑ کو بھگانے کی خاطر پولیس کو اُن پر آنسو گیس کا استعمال کرتے ہوئے دیکھا گیا۔ سینکڑوں بلوائیوں پر مشتمل پرتشدد بھیڑ کو رکوانے کی خاطردوچار پولیس والے ہی نظر آئے اور وہ بھی ہاتھ جوڑ جوڑ کر ان بلوائیوں کو واپس جانے پر رضامند کرنے کی کوششیں کرتے نظر آرہے تھے۔

سوشل میڈیا پر یہ ساری تصویریں اور ویڈیوز موجود ہیں جو جموں پولیس کے گھناؤنے رول پر واضح ثبوت پیش کررہے ہیں۔ یہاں کی چند اقتدار پرست سیاسی پارٹیوں نے جس طرح جموں بند کال کی حمایت کی اُس سے وہ کھلے طور بے نقاب ہوگئیں اور یہاں کے عوام پر واضح ہوگیا کہ ان مفاد پرست سیاستدانوں نے جموں وکشمیر میں بسنے والی اکثریتی آبادی کے تحفظ یا مفادات سے کوئی لین دین نہیں ہے، وہ صرف کسی بھی طریقے سے اقتدار کی کرسی پر براجمان ہونا چاہتے ہیں۔ جماعت اسلامی جموں وکشمیر‘ جموں میں مسلم کش دھنگوں میں وہاں کی پولیس کے گھناؤنے اور جانبدارانہ رول کی کڑی مذمت کرنے کے علاوہ اُن سیاستدانوں کے رول پر بھی اظہار افسوس کرتی ہے جنہوں نے اس مسلم کش بند کی حمایت کرکے اپنے آپ کو مزیدبے نقاب کیا۔ نیز کشمیر چیمبر آف کامرس کو اپنے گروہی مفادات سے بالاتر ہوکر حکمت عملی مرتب کرنی چاہیے تاکہ جموں کے فرقہ پرست قوتوں کی طرف سے باربار کشمیر مخالف کارروائیوں کا مؤثر توڑ کیا جاسکے۔

ایک طرف جموں کے کاروباری لوگ اربوں کھربوں روپے کا مال کشمیریوں کو فروخت کرکے اپنے سرمایہ میں اضافہ کررہے ہیں اور اپنا معیار زندگی بلند کررہے ہیں لیکن دوسری طرف جب بھی ان کو موقعہ ملتا ہے تو کشمیری مسلمانوں کے سینوں میں چھرا گھونپنے میں کوئی پس وپیش نہیں کرتے ہیں۔ ان حالات میں یہاں کی حقیقی عوامی قیادت کے ساتھ ساتھ سیول سوسائٹی اور دانشور طبقے کو بھی ایک منظم اور مؤثر حکمت عملی تشکیل دینے کے لیے یک جٹ ہوکر آگے آنا چاہیے تاکہ جموں اور یہاں پر موجود فرقہ پرست قوتوں کی ہر گھناؤنی چال کو بروقت ناکام و نامراد بنایا جاسکے۔اس کے علاوہ شمالی ہند کے مختلف علاقوں میں علی الخصوص تعلیمی اداروں میں کشمیری مسلمان طلبا اور تجار پر جس طرح منظم حملے کرائے گئے اس کے پس پردہ بھارت کی فرقہ پرست قوتیں کار فرما ہیں۔کئی مقامات پر کشمیری طلبا کو گھسیٹنے اور ان پر تشدد کرتے ہوئے دیکھا گیا جو انتہائی افسوسناک اور قابل صد مذمت کارروائی ہے۔

جماعت اسلامی جموں وکشمیر‘ مقامی پولیس کو ان واقعات سے سبق حاصل کرنے کی تلقین کرتی ہے جو اپنے لوگوں پر تشدد ڈھانے کے لیے ہر وقت مستعد رہتے ہیں اور اُن پر ہورہے ظلم کے خلاف انہیں آواز بلند کرنے کا کوئی جمہوری اور پرامن موقعہ فراہم کرنے کے لیے بھی آمادہ نہیں ہے۔ ان کو جموں میں کام کرنے والی ہم منصب پولیس کے رول سے سبق لینے کی ضرورت ہے تاکہ وہ کم از کم اپنے لوگوں سے جن کی وہ اولاد ہیں اور جن میں اُن کو رہنا بسنا ہے، منصفانہ سلوک کریں۔جماعت اسلامی جملہ انسانی حقوق کے تحفظ کی علمبردار تنظیم ہے کیوں کہ وہ اُس دین کی داعی جماعت ہے جس نے بھٹکے ہوئے انسان کو دوبارہ انسانیت کی راہ دکھائی اور عدل و انصاف کا بول بالا کیا۔ اس لیے جماعت اسلامی جموں وکشمیر‘ ہندوپاک کی حکومتوں پر زور دیتی ہے کہ وہ کشمیری عوام کے حقیقی نمائندوں سے مل کر دیرینہ انسانی مسئلے کا ایک ایسا حل تلاش کریں جو یہاں کے عوام کی خواہشات کا آئینہ دار ہو اور عدل و انصاف کے تمام تقاضوں کے عین مطابق ہو۔ اس مسئلے کے حل کے تلاش سے ہی اس خطے میں دائمی امن قائم ہوسکتا ہے۔ دریں اثنا ملی کاز کے پیش نظر جماعت اسلامی جموں وکشمیر‘ کشمیری تاجروں، سرکاری ملازمین اور ٹرانسپورٹروں کی طرف سے دئے گئے پرامن احتجاجی پروگرام کی مکمل حمایت کرتی ہے۔