خبراردو: عوامی اتحاد پارٹی کے صدر انجینئر رشید نے اضافی فورسز کی تعیناتی سے متعلق سرکاری حلقوں سمیت مخلف حلقوں کی جانب سے پھیلائی جارہی افواہوں کو تشویشناک بتاتے ہوئے اس سلسلے میں نئی دلی کو اپنا موقف واضح کرنے کیلئے کہا ہے.

آج یہاں ایک پر ہجوم پریس کانفرنس سے خطاب کرتے ہوئے انجینئر رشید نے اس بات کو ششدر کردینے والا بتایا کہ نئی دلی مسئلہ کشمیر کے حل کی بجائے جموں کشمیر میں اضافی فورسز کو تعینات کرکے یہاں کے لوگوں کو خوفزدہ کر رہی ہے. انجینئر رشید نے تاہم کہا کہ کشمیریوں کو ڈرانے کی کوشش کرنے والوں کو نہیں بھولنا چاہیے کہ کشمیریوں نے گزشتہ تیس سال کے دوران بدترین حالات کا مقابلہ کرنا سیکھا ہے لہٰذا اگر نئی دلی نے دفعہ 370 یا 35A کے ساتھ چھیڑ چھاڑ کی تو وہ اپنے مفادات کی قبر خودنے کے سوا کچھ حاصل نہیں کرسکتی ہے. انہوں نے کہا کہ یہ دونوں دفعات جموں کشمیر کے عوام کے لئے کوئی رعایت نہیں ہے بلکہ یہ ان وعدوں اور آئینی ضمانتوں کا حصہ ہیں کہ جو خود نئی دلی نے کشمیریوں کو دی ہوئی ہیں. انہوں نے کہا ” یہ بات بھی ذہن میں رکھنے والی ہے کہ جموں کشمیر کو حاصل جن آئینی ضمانتوں کو لیکر ہنگامہ برپا ہے وہ فقط اسی ایک ریاست کو نہیں دی گئی ہیں.

نئی دلی آگ سے کھیل رہی ہے اور وہی سب کرنا چاہتی ہے کہ جو نام نہاد سخت گیر اور بنیاد پرست اسے کرتے دیکھنا چاہتے ہیں. مرکزی سرکار اور حکمران جماعت بی جے پی کے مذکورہ بالا دفعات کو فقط زیر بحث لانے سے بھی ان لوگوں کی دلیل تسلیم شدہ بنتی ہے کہ جو آئین ہند کے اندر مسئلہ کشمیر کا حل نہیں دیکھتے ہیں “. انجینئر رشید نے مزید کہا کہ اس طرح کے معاملات پر غیر ضروری بحث و مباحثہ کی حوصلہ افزائی کر کے نئی دلی در اصل خود اپنی اس دعویداری کو جھٹلا رہی ہے کہ مسئلہ کشمیر کو آئین ہند کے دائرے میں حل کیا جاسکتا ہے. انہوں نے کہا” اتنا ہی نہیں بلکہ نئی دلی کے اس رویہ سے جموں کشمیر میں مین سٹریم سیاست کے مواقع ختم ہوتے ہیں اور ان لوگوں کے راستے بند ہوجاتے ہیں کہ جو آئینی حدود کے اندر رہتے ہوئے مسئلہ کشمیر کے حل کی بات کرنے والے ہیں “. انجینئر رشید نے کہا کہ اگر اضافی فورسز کو امن و قانون کے لئے لایا جارہا ہے تو پھر اس دعویداری کا کیا کہ کشمیر کے حالات ٹھیک ہو رہے ہیں اور ملی ٹینسی میں کمی آرہی ہے. انجینئر رشید نے کہا کہ جب جب کشمیر میں اضافی فورسز کی تعیناتی ہوگی ریاست میں بحالی امن کی دعویداریاں ڈھکوسلہ ثابت ہوتی رہیں گی. انہوں نے کہا کہ نریندر مودی، امت شاہ اور راجناتھ سنگھ کو اس بات کا جواب دینا چاہئے کہ انکے پاس کشمیریوں کو پیش کرنے کے لئے کیا ہے کہ جو وہ گاہے گاہے انہیں مذاکرات کے لئے آمادہ ہونے کیلئے کہتے رہتے ہیں.

عوامی اتحاد پارٹی کے صدر نے کہا کہ جموں کشمیر کی خصوصی پوزیشن کے ساتھ چھیڑ چھاڑ سے مین اسٹریم کے سیاستدان ننگا ہوجائیں گے اور انکی جگہ ہمیشہ کیلئے ختم سمجھی جانی چاہئے. انہوں نے کہا کہ اگرچہ بھاجپا لیڈر شیو راج سنگھ چوہان نے افواہوں کو رد کردیا ہے تاہم مرکزی سرکار کو ٹھوس اور با ضابطہ وضاحت دیکر بے چینی کو دور کرنا چاہیے. انہوں نے کہا کہ جموں کشمیر میں موجودہ بے چینی اور ابہام کی صورتحال ہندوستان کیلئے جشن منانے کی کوئی بات نہیں ہے بلکہ اس پر ہند مخالف عناصر خوب خوشیاں مناتے ہونگے. انجینئر رشید نے کہا کہ جموں اور لداخ کے لوگوں کو دفعات مذکورہ کو کشمیریوں کا مسئلہ نہیں سمجھنا چاہئے بلکہ انہیں ان دفعات کی اصل اہمیت کا ادراک کرتے ہوئے کسی بھی پروپیگنڈہ کا شکار ہونے َے بچنا چاہئے. انہوں نے کہا “حیرت ہے کہ کشمیریوں پر قومی مفاد کے خلاف ہونے کا الزام عائد کیا جاتا ہے لیکن نئی دلی کی وعدہ خلافی پر کوئی بات نہیں کرتا. وقت وقت کی ہندوستانی حکومتوں نے الحاق کی شرائط کو توڑا ہے لجک. افسوس اس بات کا ہے کہ کشمیریوں پر پاکستان کے پراکسی ہونے کا الزام لگایا جاتا رہا ہے. دلی والوں کو یہ بات ذہن نشین رکھنی چاہئے کہ مہاراجہ یا الحاق کے لوازمات سے وابستہ رہنے والے کسی اور نے پاکستان سے اجازت نہیں مانگی تھی اور نہ ہی دستاویز الحاق میں وہ شقیں پاکستان نے شامل کروائی تھیں کہ جن پر ابھی ہنگامہ کیا جارہا ہے”.

نیشنل کانفرنس، پی ڈی پی اور دیگر جماعتوں کو نئی دلی کے گناہوں میں شریک بتاتے ہوئے انجینئر رشید نے کہا کہ ان جماعتوں نے ہمیشہ دلی کے منصوبوں کو عملانے کا کام کیا ہے جس کے لئے ان سبھی کو ریاستی عوام سے معافی مانگنی چاہیے. تاہم انہوں نے کہا کہ موجودہ حالات اختلافات کو بھول کر ان سبھی کے اتحاد کا تقاضا کرتے ہیں کہ جو واقعی دفعہ 370 اور 35 A کا تحفظ کرنا چاہتے ہیں. انہوں نے زور دیتے ہوئے کہا کہ ان دفعات کا تحفط مذہب، زبان، ذات اور دیگر عصبیتوں سے بالا ہوکر جموں کشمیر کے سبھی باشندوں کیلئے مساوی اہمیت کا حامل ہے لہٰذا سبھی کو ایک ہوکر ان دفعات کے خلاف ہونے والی سازشوں کے مقابلہ کیلئے تیار ہونا چاہئے.انجینئر رشید نے سرکار کی طرف سے سرینگر گالف کلب کو عام لوگوں کیلئے کھولنے کا خیر مقدم کرتے ہوئے سرکار سے کہا ہے کہ اگر اس کی نیت صاف ہے تو اسے چاہئے کہ جموں گالف کلب کو بھی عام لوگوں کیلئے اسی طرح کھولا جائے۔

کرپشن کے متعلق گورنر انتظامیہ کی طرف سے اٹھائے گئے اقدامات کیلئے اپنی حمایت کا اعادہ کرتے ہوئے انجینئر رشید نے کہا کہ اگر چہ ہر کشمیری کرپشن کے خلاف جہاد میں سرکار کا ساتھ دینے کیلئے تیار ہے لیکن جس طرح سے صرف چند اشخاص کو نشانہ بنایا جا رہا ہے اس سے یہ بات عیاں ہے کہ کشمیری سیاستدانوں کی اعتباریت کو ختم کرنا چاہتی ہے۔

انجینئر رشید نے کہا کہ نئی حد بندی کے بارے میں کسی کو کوئی اعتراض نہیں لیکن اگر 2026تک ایسا کرنے میں قانونی پیچیدگیاں حائل ہیں تو اسمبلی انتخابات کے بعد مناسب طریقے سے اسمبلی کے اندر ترامیم کے بعد از سر نو حدبندی کی شروعات کی جا سکتی ہے۔ انجینئر رشید نے مغربی پاکستانی رفیوجیوں کو مہمان قرار دیتے ہوئے اس بات کو دہرایا کہ وہ کسی بھی قیمت پر ریاست کے شہری نہیں بن سکتے اور انہیں ہر حال میں واپس مغربی پاکستان اپنے اپنے گھروں کو بھیجنے کے اقدامات اٹھائے جانے چاہئیں۔