تہران، ایران کے صدر مسعود پزشکیان کا کہنا ہے کہ جنگ کسی کے مفاد میں نہیں۔

ایک بیان میں انہوں نے کہا ہے کہ کشیدگی کم کرنے کے لیے ہر عقلی اور سفارتی راستہ اختیار کیا جانا چاہیے۔ مسعود پزشکیان کا کہنا ہے کہ دشمن پر عدم اعتماد اور باہمی روابط میں محتاط رہنا ایک ناقابلِ تردید ضرورت ہے۔

دوسری جانب ایرانی پارلیمنٹ کی قومی سلامتی کمیٹی کے سربراہ ابراہیم عزیزی کا کہنا ہے کہ ہم موجودہ مذاکرات کو میدانِ جنگ کا تسلسل سمجھتے ہیں، ایران نے امریکا کے ساتھ مذاکرات جاری رکھنے کا فیصلہ کیا ہے۔ قطری ٹی وی سے گفتگو کرتے ہوئے انہوں نے کہا ہے کہ مذاکرات کا یہ مطلب نہیں کہ کسی بھی قیمت پر بات چیت کی جائے، مذاکرات کا یہ مطلب نہیں کہ دوسرے فریق کے ہر طریقہ کار کو قبول کر لیا جائے۔

ابراہیم عزیزی کا کہنا ہے کہ ایران نے واضح ریڈ لائنز مقرر کر رکھی ہیں جن کا احترام ضروری ہے، ایران کی مذاکراتی حکمتِ عملی مکمل قومی مفادات اور سیکیورٹی تقاضوں کے تحت ہوتی ہے۔

یو این آئی۔ ع ا۔

تہران، ایرانی اسپیکرِ اسمبلی محمد باقر قالیباف نے کہا ہے کہ تہران امریکہ کے ساتھ مذاکرات جاری رکھے ہوئے ہے مگر ممکنہ نئی کشیدگی کے پیشِ نظر “ضروری اقدامات” کرنے کے لیے تیار بھی ہے۔

ایرانی نیم سرکاری خبر رساں ادارے مہر نیوز ایجنسی کے مطابق ،قالیباف نے ٹیلی ویژن پر ایک انٹرویو میں بتایا ہے کہ “ہم دشمن پر بھروسہ نہیں کرتے۔ کسی بھی لمحے وہ جنگ بندی کو بگاڑ سکتا ہے۔” انہوں نے کہا کہ “ہم مذاکرات کر رہے ہیں، مگر ہم ضروری اقدامات کے لیےبھی تیار ہیں۔” انہوں نے کہا کہ ایران نے گزشتہ برس جون میں ہونے والی 12 روزہ جنگ سے سبق سیکھا ہے اور مستقبل میں کسی بھی مقابلے کے لیے تیار ہے۔

قالیباف نے یہ بھی کہا کہ امریکہ اور اسرائیل کے ساتھ جاری تصادم مذاکراتی عمل کے دوران “امریکی دھوکہ بازی ” کے ساتھ شروع ہوا۔ یہ بیان اس کے بعد آیا جب امریکی فوج کے سینٹرل کمانڈ نے ایک پوسٹ میں تصدیق کی کہ امریکی بحری افواج نے خلیج عمان میں ایرانی پرچم بردار ایک کارگو جہاز کو “روکتے ہوئے غیر فعال کر دیا”۔

سینٹ کوم کا کہنا ہے کہ بحیرہ عرب میں آپریشن کرنے والی امریکی افواج نے ایک ایرانی پرچم بردار کارگو جہاز جو کہ ایرانی بندر گاہ کی جانب جانے کی کوشش میں تھا کے خلاف بحری محاصرے کے تحت کارروائی کی۔

ایران کے خاتم الانبیا فوجی ہیڈکوارٹرز نے بھی نیم سرکاری تسنیم نیوز ایجنسی کے ذریعے شائع کیے گئے ایک بیان میں امریکی فوج کی جانب سے ایک جہاز پر کیے گئے حملے کی تصدیق کی ہے۔ تہران نے ایرانی پرچم بردار بحری جہاز کی جبری ضبطی کے بعد جسے وہ “بحری قزاقی” قرار دے رہا ہے، جلد ہی جوابی کارروائی کا عزم ظاہر کیا ہے۔

فوجی ہیڈکوارٹر کا کہنا ہے کہ”جارح امریکہ نے جنگ بندی کی خلاف ورزی اور بحری قزاقی کا ارتکاب کرتے ہوئے بحر عمان کے پانیوں میں ایران کے ایک تجارتی جہاز پر فائر کر کے اسے نشانہ بنایا اور اس کے نیویگیشن سسٹم کو غیر فعال کر دیا۔

ایرانی صدر کے نائبِ اول محمدرضا عارف نے بھی خبردار کیا کہ اگر ایران کی تیل کی برآمدات محدود رہیں تو ہرمز کی سکیورٹی کی ضمانت نہیں دی جا سکتی۔

عارف نے ایکس پر اپنی پوسٹ میں کہا ہے کہ”کوئی بھی ایران کی تیل برآمدات کو محدود نہیں کر سکتا اور ایسا ہونے کی صورت میں ہرمز میں سیکیورٹی کی توقع نہ کی جائے۔” عارف نے کہا کہ دنیا کے سامنے انتخاب موجود ہے :”سب کے لیے آزاد پیٹرول کی منڈی ’’ یا ‘‘ہر کسی کے لیے بلند لاگت۔’’ انہوں نے یہ بھی کہا کہ عالمی ایندھن کی قیمتوں میں استحکام ‘‘ایران اور اس کے حلیفوں کے خلاف معاشی اور عسکری دباؤ کے ایک یقینی اور دیرپا خاتمے’’ پر منحصر ہے۔ 28 فروری کو امریکہ اور اسرائیل نے ایران پر مشترکہ حملہ کیا، جس کے جواب میں ایران نے اسرائیل اور دیگر علاقائی ممالک میں امریکی اثاثوں کی موجودگی والے مقامات پر جوابی حملے کیے۔

جنگ 8 اپریل سے تعطل کا شکار ہے، جب پاکستان نے دو ہفتوں کے لیے جنگ بندی کے لیے ثالثی کی۔ امریکہ اور ایران نے اس ماہ کے اوائل میں پاکستان میں ایک پائیدار امن کے لیے بات چیت کی اور اسلام آباد میں مزید ایک دورکے انتظامات جاری ہیں۔

یو این آئی۔ ع ا۔

تہران، ایران نے امریکہ کے ساتھ مزید مذاکرات سے انکار کر دیا ہے اور کہا ہے کہ واشنگٹن سے فی الحال بات چیت کا کوئی ارادہ نہیں ہے۔

ترجمان ایرانی وزارت خارجہ اسماعیل بقائی نے نیوز کانفرنس میں کہا ہے کہ امریکہ کے ساتھ کسی نئے مذاکراتی دور کا کوئی منصوبہ نہیں، واشنگٹن سے فی الحال بات چیت کا ارادہ نہیں ہے۔

ترجمان نے کہا موجودہ حالات میں امریکہ کے ساتھ بات چیت ممکن نہیں ہے، امریکہ ماضی سے سبق نہیں سیکھ رہا، امریکی پالیسیوں میں کوئی تبدیلی نہیں آئی جس کے نتائج بھی بہتر نہیں ہوں گے۔ ایران کی وزارت خارجہ کے مطابق امریکہ کی غلطیوں کا تسلسل خطے کے لیے بھی خطرناک ثابت ہو سکتا ہے، غلط پالیسیوں سے کبھی مثبت نتائج نہیں نکل سکتے، امریکہ کی روش خطے میں مزید کشیدگی کو جنم دے رہی ہے۔

وزارت خارجہ کے ترجمان نے کہا کہ امریکہ کے اقدامات خطے میں استحکام کی بجائے بحران بڑھا رہے ہیں، امریکہ میڈیا کے ذریعے متضاد بیانات دے رہا ہے جب کہ ہم نے ایک ہی مؤقف رکھا ہے، ہماری شرائط لاجک پر مبنی ہیں اور کچھ میڈیا ایسا دعویٰ کر رہا ہے جس کا اصل سے کوئی تعلق نہیں۔ اسماعیل بقائی نے کہا امریکہ پر کوئی بھروسہ نہیں کر سکتا، وہ اب بھی غیر حقیقی مطالبات پر انحصار کر رہا ہے، ماضی میں بھی امریکہ نے معاہدوں کے منافی اقدامات کیے۔ امریکہ نے بحری ناکہ بندی جاری رکھ کر جنگ بندی کی خلاف ورزی کی، امریکی اقدامات سے ظاہر ہوتا ہے کہ سفارت کاری میں ان کی دل چسپی نہیں ہے، ایسے میں ایران اپنے مفادات کا تحفظ جاری رکھے گا۔

ترجمان نے کہا کہ ایران کے قومی مفادات کسی ملک کی بدمعاشی پر قربان نہیں کر سکتے، پاکستان کو بطور ثالث امریکہ کی جانب سے جنگ بندی کی خلاف ورزیوں سے آگاہ کر دیا، پاکستان نے امن کے لیے اپنا بھرپور کردار ادا کیا ہے، ایران پر جارحیت کے لیے امریکہ نے پڑوسی ممالک کے اڈے استعمال کیے۔ انھوں نے کہا ایران نے 10 نکاتی تجویز پیش کی تھی جس پر اسلام آباد ٹاکس میں غور کیا گیا، امریکہ نے لبنان میں جنگ بندی کو سیز فائر معاہدے کا حصہ ماننے سے انکار کیا، امریکہ نے بحری ناکہ بندی نافذ کر کے کشیدگی مزید بڑھا دی ہے، ایرانی جہاز پر حملہ جنگ بندی اور عالمی قوانین کی خلاف ورزی ہے، اس نے مذاکراتی عمل کی 2 بار خلاف ورزی کی، لبنان میں جنگ بندی کی بنیاد پر ہی ہم نے آبنائے ہرمز کو کھولا تھا، لیکن ہم نے امریکی بددیانتی کے کئی اقدامات دیکھے، جس سے ظاہر ہوتا ہے امریکہ جنگ بندی کے لیے سنجیدہ نہیں ہے۔

ترجمان ایرانی وزارت خارجہ نے کہا قومی سلامتی پر کوئی سمجھوتہ نہیں ہوگا، ایرانی مسلح افواج کسی بھی حملے کا سخت جواب دینے کے لیے تیار ہیں۔ انھوں نے کہا افزودہ یورینیم کی منتقلی سے متعلق امریکہ نے میڈیا میں بہت باتیں کیں، جب کہ مذاکراتی دور میں اس نے افزودہ یورینیم کی منتقلی سے متعلق بات ہی نہیں کی تھی۔ اسماعیل بقائی نے کہا کہ دشمن ایران کی سائنسی میدان میں ترقی نہیں دیکھنا چاہتے، دنیا کے دیگر ممالک کی طرح ایران کی عوام کا بھی سائنسی میدان میں ترقی حق ہے، ایران کی ترقی روکنے کے لیے دشمن نے ہماری یونیورسٹیوں اور اسکولوں کو نشانہ بنایا۔

یو این آئی۔ ع ا۔