سری نگر، جموں و کشمیر کے لیفٹیننٹ گورنر منوج سنہا نے پیر کے روز کھلاڑیوں سے اپیل کی کہ وہ ’’نشہ مکت جموں و کشمیر ابھیان‘‘ کے سفیر بنیں اور نوجوانوں کو منشیات سے دور رہنے اور کھیلوں کو اپنانے کی ترغیب دیں۔

لیفٹیننٹ گورنر کشمیر یونیورسٹی میں آل انڈیا انٹر یونیورسٹی ووشو چیمپئن شپ کی افتتاحی تقریب سے خطاب کر رہے تھے۔

اپنے خطاب میں انہوں نے کہا کہ انتظامیہ اعلیٰ تعلیمی اداروں میں مضبوط اسپورٹس کلچر کے فروغ کے لیے پرعزم ہے، تاکہ ہر طالب علم کو صحت مند اور فعال طرزِ زندگی اپنانے کے مساوی مواقع فراہم کیے جا سکیں۔

انہوں نے کہا کہ آل انڈیا انٹر یونیورسٹی ووشو چیمپئن شپ صرف ایک کھیلوں کا مقابلہ نہیں بلکہ ’’ایک بھارت، شریشٹھ بھارت‘‘ کے جذبے کی جیتا جاگتا مظہر ہے، جو تنوع میں اتحاد، نظم و ضبط، بہترین کارکردگی اور قومی یکجہتی کو فروغ دیتا ہے۔

انہوں نے کہاکہ“یہ چیمپئن شپ ہمیں اس کھیل کی اصل روح کو زندہ رکھنے کی ذمہ داری بھی دیتی ہے، جو محض مقابلے سے بالاتر ہو کر ہمیں اعلیٰ انسانی اقدار سے جوڑتی ہے۔ کشمیر یونیورسٹی میں ہونے والی یہ چیمپئن شپ نہ صرف مقابلوں کی شاندار کارکردگی بلکہ دوستی کے رشتوں، رکاوٹوں کو توڑنے اور ایک متحد، پُرعزم اور ہمدرد ہندوستانی خاندان کے احساس کو تازہ کرنے کے لیے یاد رکھی جائے۔”

لیفٹیننٹ گورنر نے کہا کہ ووشو کا سخت نظم و ضبط نوجوانوں کی مضبوطی اور استقامت کی عکاسی کرتا ہے۔ انہوں نے کہا کہ یہ چیمپئن شپ ثقافتی تبادلے کا ایک پلیٹ فارم ہے جہاں حریف دوست بن جاتے ہیں اور اساتذہ ملک کے مستقبل کی رہنمائی کرتے ہیں۔

انہوں نے کھلاڑیوں کی حوصلہ افزائی کی کہ وہ اپنے موبائل فون سے مختصر ویڈیوز بنا کر سوشل میڈیا پر شیئر کریں تاکہ منشیات کے خلاف بیداری پھیلائی جا سکے اور دوسروں کو مثبت طرزِ زندگی اپنانے کی ترغیب دی جا سکے۔

یواین آئی۔ ظا

سری نگر، جموں و کشمیر انسداد بدعنوانی بیورو (اے سی بی) نے مبینہ غیر قانونی تعمیرات کے ایک معاملے میں سری نگر میونسپل کارپوریشن (ایس ایم سی) کے چار اہلکاروں سمیت 11 ملزمان کے خلاف چارج شیٹ داخل کر دی ہے، حکام نے پیر کے روز یہ اطلاع دی۔

یہ چارج شیٹ ایڈیشنل اسپیشل جج، انسداد بدعنوانی، سری نگر کی عدالت میں پیش کی گئی، جو 2020 میں درج ایف آئی آر کے سلسلے میں ہے، جسے جموں و کشمیر انسداد بدعنوانی ایکٹ اور آر پی سی کی دفعہ 120-بی کے تحت درج کیا گیا تھا۔

یہ معاملہ جواہر نگر، گونی خان، ہری سنگھ ہائی اسٹریٹ اور وزیر باغ میں بغیر مناسب اجازت کے چھ غیر قانونی عمارتوں کی تعمیر سے متعلق ہے، جو مبینہ طور پر ایس ایم سی اہلکاروں کی ملی بھگت سے کی گئی۔

اے سی بی کے مطابق زبانی اور دستاویزی شواہد پر مبنی تحقیقات میں الزامات ثابت ہوئے ہیں اور اہلکاروں اور فائدہ اٹھانے والوں کے درمیان سازش کی تصدیق ہوئی ہے۔

حکومت سے قانونی اجازت حاصل کرنے کے بعد چارج شیٹ عدالت میں دائر کی گئی ہے تاکہ عدالتی کارروائی آگے بڑھ سکے۔

اس معاملے کی اگلی سماعت 16 جون کو مقرر کی گئی ہے۔

یواین آئی۔ ظا

سری نگر، ’’نشہ مکت جموں و کشمیر ابھیان‘‘ کے تحت جاری مہم میں سخت کارروائی کرتے ہوئے پولیس نے پیر کے روز سری نگر میں ایک عادی منشیات فروش کی غیر قانونی طور پر تعمیر شدہ رہائشی عمارت کو منہدم کر دیا، حکام نے بتایاکہ ’’پولیس کے مطابق ملزم محمد عرفان شیخ عرف ’اف‘، پامپوش کالونی، پلپورہ نورباغ کا رہائشی ہے اور وہ منشیات کے معاملات میں ملوث ایک معروف مجرم ہے، جس کے خلاف 2024 اور 2021 میں پولیس اسٹیشن صفاکدل اور سنگم میں این ڈی پی ایس کے تحت کئی مقدمات درج ہیں۔ ‘‘

تحقیقات سے یہ بات سامنے آئی ہے کہ مذکورہ عمارت غیر قانونی طور پر اس زمین پر تعمیر کی گئی تھی جو منشیات کی اسمگلنگ سے حاصل ہونے والی آمدنی سے خریدی اور ترقی دی گئی تھی۔

پولیس نے بتایا کہ یہ تعمیرات قانونی اجازت کے بغیر کی گئی تھیں، جو محصولات کے قوانین کی کھلی خلاف ورزی ہے۔ مزید یہ بھی معلوم ہوا ہے کہ ملزم کے قریبی ساتھی اور خاندان کے افراد بھی وادی بھر میں مختلف این ڈی پی ایس مقدمات میں ملوث ہیں، جو ایک وسیع نیٹ ورک کی نشاندہی کرتا ہے۔

مصدقہ اطلاعات اور قانونی کارروائی مکمل کرنے کے بعد متعلقہ حکام کے تعاون سے یہ انہدامی کارروائی قانون کے مطابق انجام دی گئی۔

پولیس کا کہنا ہے کہ یہ کارروائی ایک واضح پیغام ہے کہ منشیات کی کمائی سے بنائی گئی جائیدادوں کو بخشا نہیں جائے گا اور اس غیر قانونی کاروبار میں ملوث افراد کو سخت نتائج کا سامنا کرنا پڑے گا۔

پولیس نے منشیات کے خلاف اپنی زیرو ٹالرنس پالیسی کو دہراتے ہوئے کہا کہ وہ اس کے پورے نیٹ ورک، بشمول مالی اور لاجسٹک نظام، کو ختم کرنے کے لیے پرعزم ہے۔

یواین آئی۔ ظ ا