بیجنگ، چینی وزارتِ خارجہ نے متحدہ عرب امارات کے ساحل کے قریب خلیج میں اپنے آئل ٹینکر پر حملے کے واقعے پر شدید تشویش کا اظہار کیا ہے۔

چینی وزارتِ خارجہ کے ترجمان کے مطابق حملے کا نشانہ بننے والے ٹینکر پر چینی عملہ موجود تھا تاہم اب تک کسی جانی نقصان کی اطلاع موصول نہیں ہوئی۔

رائٹرز کے مطابق چینی ٹینکر 4 مئی کو مینا صقر کے قریب حملے کا نشانہ بنا۔

چینی میڈیا ادارے شیاشن نے رپورٹ کیا ہے کہ حملے کے بعد نامعلوم جہاز کے ڈیک میں آگ بھڑک اٹھی، جہاز کی شناخت ’چائنا آنر اینڈ کریو‘ کے نام سے کی گئی ہے۔ واقعہ ایسے وقت پیش آیا ہے جب امریکہ اور ایران کے درمیان بڑھتی ہوئی کشیدگی کے باعث خلیج میں بحری سرگرمیاں شدید متاثر ہو رہی ہیں۔

رپورٹس کے مطابق سیکڑوں بحری جہاز اور تقریباً 20 ہزار سی فیررز خطے میں پھنسے ہوئے ہیں جبکہ سمندری تجارت اور سیکیورٹی سے متعلق خدشات میں اضافہ ہورہا ہے۔

یو این آئی۔ ع ا۔

ویانا، بین الاقوامی توانائی ایجنسی کے سربراہ فتح بیرول نے کہا ہے کہ امریکہ ایران جنگ ختم ہوگئی تب بھی تیل کی قیمتوں میں اتار چڑھاؤ کا امکان جاری رہے گا۔

فتح بیرول نے ایک بیان میں کہا کہ جنگ ختم ہونے کے بعد تیل کی سپلائی بتدریج بہتر ہوگی لیکن تیل کی حفاظت ایک اہم مسئلہ رہےگی۔ انہوں نے کہا کہ عالمی توانائی کی منڈیاں مشکلات کی طرف جارہی ہیں کیونکہ آبنائے ہرمز بند ہونے سے تیل کی سپلائی متاثر ہوئی ہے۔

بین الاقوامی توانائی ایجنسی کے سربراہ کا کہنا تھا کہ اگر تیل کی سپلائی متاثر رہی تو آئی ای اے اپنے اسٹریٹیجک ذخائر سے مزید تیل جاری کرنے کے لیے تیا رہے۔

یو این آئی۔ ع ا۔

تہران، نائب ایرانی صدر محمد رضا عارف نے کہا ہے کہ علاقائی سلامتی یقینی بنانےکیلئے ہمسایوں کے ساتھ کام کرنے کیلئے تیار ہیں۔

اپنے بیان میں انہوں نے کہا کہ ایرانی عوام جنگ کے حقیقی فاتح ہیں اور جلد فتح کا جشن منائیں گے، جنگ کے بعد خطے میں تعاون کا فروغ اور اسے اقتصادی مرکز میں تبدیل کرنا ہے۔

نائب صدر نے کہا کہ ایران کی پالیسی ہمیشہ علاقائی تعاون پر مبنی رہی ہے کسی بھی قسم کی اجارہ داری پر یقین نہیں رکھتے، آبنائے ہرمز ایران کی جائز ملکیت ہے ہم نے برسوں سے اسٹریٹجک اثاثے کا مکمل استعمال نہیں کیا اب ہم آبنائے ہرمز پر کنٹرول حاصل کرنے کیلئے پرعزم ہیں۔ محمد رضا عارف کا کہنا تھا کہ ایران نے عالمی قوانین اور اسٹریٹجک تحفظات پر آبنائے ہرمز کے انتظام کا فیصلہ کیا ایران اب اہم آبی گزرگاہ کی سیکیورٹی کویقینی بنائے گا۔

یو این آئی۔ ع ا ۔