بیجنگ، امریکی صدر ڈونلڈ ٹرمپ نے کہا ہے کہ ایران کے جوہری پروگرام کو 20 سال کیلئے معطل کرنے پر انہیں کوئی اعتراض نہیں، تاہم اس کیلئے حقیقی عزم ضروری ہے۔

دو روزہ دورۂ چین مکمل کرنے کے بعد بیجنگ میں صحافیوں سے گفتگو کرتے ہوئے ڈونلڈ ٹرمپ نے کہا کہ وہ چند دنوں میں ایرانی تیل خریدنے والی چینی کمپنیوں پر عائد پابندیاں اٹھانے سے متعلق فیصلہ کریں گے۔

انہوں نے کہا کہ چین امریکہ سے اربوں ڈالر مالیت کی سویا بین خریدے گا۔

امریکی صدر کے مطابق انہوں نے شی جن پنگ کے ساتھ جوہری ہتھیاروں میں کمی اور تائیوان کے معاملے پر بھی بات چیت کی۔

ڈونلڈ ٹرمپ نے کہا کہ انہیں نہیں لگتا کہ تائیوان پر کوئی تنازع ہونے جا رہا ہے۔

انہوں نے واضح کیا کہ اب تک تائیوان کو ہتھیار فراہم کرنے کی منظوری نہیں دی گئی، تاہم مستقبل میں اس امکان کو رد بھی نہیں کیا جا سکتا۔

ٹرمپ کا کہنا تھا کہ انہوں نے تائیوان کے معاملے پر چین سے کوئی وعدہ نہیں کیا۔

یواین آئی۔ م س

نئی دہلی، کانگریس نے وزیر اعظم نریندر مودی کے سونے کے زیورات نہ خریدنے کے مشورے اور مرکزی حکومت کی جانب سے سونے چاندی پر امپورٹ ڈیوٹی بڑھانے کے فیصلے کو جولری کی صنعت پر حملہ قرار دیتے ہوئے حکومت سے 3.5 کروڑ سے زائد سناروں، کاریگروں اور چھوٹے کاروباریوں کے لیے خصوصی اقتصادی ریلیف پیکیج دینے کا مطالبہ کیا ہے کانگریس کے جنرل سکریٹری اور ایم پی رندیپ سنگھ سرجے والا نے جمعہ کو یہاں پارٹی ہیڈکوارٹر میں پریس کانفرنس کرتے ہوئے کہا کہ مسٹر مودی کی جانب سے سونے کے زیورات نہ خریدنے کی اپیل اور حکومت کی جانب سے سونے اور چاندی پر درآمدی ڈیوٹی (امپورٹ ڈیوٹی) 6 فیصد سے بڑھا کر 15 فیصد کرنے سے جیولری کے شعبے پر شدید بحران منڈلا رہا ہے۔ انہوں نے الزام لگایا کہ اس سے 3.5 کروڑ سے زائد سناروں، دکانداروں، تاجروں، کاریگروں اور مزدوروں کا روزگار متاثر ہونے والا ہے۔ انہوں نے کہا کہ ہندوستان میں سونے کے زیورات ثقافتی، سماجی اور مذہبی روایات کا اہم حصہ ہیں اور کروڑوں خواتین کے لیے معاشی تحفظ کا ذریعہ بھی ہیں۔ ملک میں 90 فیصد سے زیادہ جولری کا کاروبار ایم ایس ایم ای سیکٹر سے وابستہ ہے، جس سے کروڑوں لوگوں کی روزی روٹی وابستہ ہے۔

مسٹر سرجے والا نے الزام لگایا کہ سونے کے زیورات نہ خریدنے کے مشورے اور امپورٹ ڈیوٹی میں اضافے سے زیورات کے کاروبار پر دوہری مار پڑے گی اور اس سے اسمگلنگ بڑھنے کا بھی خدشہ ہے۔ ان کا کہنا تھا کہ مودی حکومت کے نوٹ بندی، ٹیکس پالیسیوں، جی ایس ٹی اور لازمی ہال مارکنگ جیسے فیصلوں سے یہ شعبہ پہلے ہی متاثر رہا ہے۔ انہوں نے حکومت سے مطالبہ کیا کہ جولری کی صنعت سے وابستہ کروڑوں محنت کشوں کے لیے فوری طور پر ریلیف پیکیج کا اعلان کیا جائے تاکہ وہ حکومتی پالیسیوں سے پیدا ہونے والے بحران سے نکل سکیں۔ کانگریس نے یہ بھی مطالبہ کیا کہ سونے پر امپورٹ ڈیوٹی بڑھانے کے بجائے مقامی سطح پر سونے کے استعمال، ری سائیکلنگ اور انکم ٹیکس قوانین میں ترمیم جیسے متبادل راستوں پر غور کیا جائے۔ پارٹی نے کہا کہ وہ اس مسئلے کو پارلیمنٹ سے سڑک تک اٹھائے گی۔

یواین آئی۔ایف اے

نئی دہلی، ایرانی وزیرِ خارجہ عباس عراقچی نے کہا ہے کہ ایران نے جنگ کا آغاز نہیں کیا بلکہ صرف اپنا دفاع کیا ہے اور تہران جنگ بندی برقرار رکھنے کی کوشش کر رہا ہے۔

نئی دہلی میں پریس کانفرنس کرتے ہوئے عباس عراقچی نے کہا کہ آبنائے ہرمز میں رکاوٹوں کا ذمہ دار ایران نہیں ہے اور ایران کے خلاف جنگ میں ملوث ممالک کے علاوہ یہ بحری گزرگاہ سب کیلئے کھلی ہے۔

انہوں نے کہا کہ آبنائے ہرمز سے گزرنے کیلئے ایران کو اعتماد میں لینا ضروری ہو گا۔

ایرانی وزیرِ خارجہ نے کہا کہ ایران کبھی ایٹمی ہتھیار نہیں بنانا چاہتا اور اس کا جوہری پروگرام صرف پُرامن مقاصد کیلئے ہے۔

عباس عراقچی کے مطابق ایران کے مسئلے کا حل صرف بات چیت میں ہے، تاہم تہران کو امریکہ پر کوئی بھروسہ نہیں۔

انہوں نے کہا کہ ایران ہر قسم کے دباؤ اور کارروائی کے خلاف بھرپور مزاحمت کرے گا۔

ان کا کہنا تھا کہ 40 روزہ جنگ کے باوجود امریکہ ایران کے خلاف اپنے مقاصد حاصل نہیں کر سکا، جس کے بعد واشنگٹن نے دوبارہ مذاکرات کی بات کی۔

عباس عراقچی نے کہا کہ ایران کے پاس امریکہ پر اعتماد کرنے کا کوئی جواز موجود نہیں ہے۔

ایرانی وزیرِ خارجہ کے مطابق ایران کے کسی بھی معاملے کا عسکری حل ممکن نہیں جبکہ ملک کئی برسوں سے امریکی پابندیوں کا سامنا کر رہا ہے۔

انہوں نے مزید کہا کہ ایرانی قوم صرف عزت کی زبان سمجھتی ہے اور امریکہ کے ساتھ کسی بھی ممکنہ معاہدے سے پہلے تمام معاملات واضح ہونا ضروری ہیں۔

یواین آئی۔ م س