تہران، ایرانی میڈیا نے جمعہ کو رپورٹ کیا ہے کہ پاکستانی وزیر داخلہ محسن نقوی نے ایرانی وزیر خارجہ عباس عراقچی کے ساتھ ایک اور ملاقات کی تاکہ امریکہ اور ایران کے درمیان جنگ ختم کرنے کے لیے پیش کردہ تجاویز کا جائزہ لیا جا سکے۔

ایران کی نیم سرکاری نیوز ایجنسی تسنیم کے مطابق، ملاقات کا مرکز تہران اور واشنگٹن کے درمیان جاری بالواسطہ رابطوں سے متعلق تجاویز کا جائزہ لینا تھا۔ جمعرات دیر گئے ایران کی نیم سرکاری خبر رساں ایجنسی اِسنا نے رپورٹ کیا کہ پاکستان کی ثالثی کے ذریعے ایران اور امریکہ کے درمیان پیغام رسانی جاری ہے اور فریم ورک معاہدے تک پہنچنے کی کوششیں جاری ہیں، تاہم کچھ اختلافات ابھی حل طلب ہیں۔

اِسنا کے مطابق، نقوی، جو اس ہفتے دوسری بار تہران گئے، نے امریکی جانب کا ایک پیغام ایرانی حکام تک پہنچایا۔ اِسنا کے حوالے سے پاکستانی ذرائع نے کہا کہ اگر دونوں فریق تجویز کردہ فریم ورک کو حتمی شکل دے دیں تو پاکستان کے فیلڈ مارشل عاصم منیر بھی ایرران کا دورہ کریں گے۔ انادولو کی سابقہ رپورٹ میں شامل 14 نکاتی ایرانی تجویز کے تحت، تہران مستقل جنگ بندی کے بعد 30 روز کے اندر اپنے جوہری پروگرام پر علیحدہ مذاکرات چاہتا ہے، جن میں افزود شدہ یورینیم کے معاملات بھی شامل ہیں۔ تاہم واشنگٹن چاہتا ہے کہ جوہری مسئلہ کسی بھی مستقل جنگ بندی سے پہلے بحث کر کے ‘حل’ کیا جائے۔ فروری میں امریکہ اور اسرائیل نے ایران پر حملے کیے۔

تہران نے جوابی کارروائی میں اسرائیل اور خلیج کے امریکی حلیفوں کو نشانہ بناتے ہوئے حملے کیے اور آبنائے ہرمز بند کر دی۔ پاکستانی ثالثی سے 8 اپریل کو جنگ بندی نافذ ہوئی، مگر اسلام آباد میں بات چیت ایک پائیدار معاہدہ حاصل کرنے میں ناکام رہیں۔ بعد ازاں امریکی صدر ڈونلڈ ٹرمپ نے جنگ بندی کو غیر معینہ مدت کے لیے بڑھا دیا جبکہ اس اسٹریٹجک آبی راستے کے ذریعے ایرانی بندرگاہوں سے آنے یا جانے والے جہازوں پر ناکہ بندی برقرار رکھی گئی۔

یو این آئی۔ ع ا۔

واشنگٹن، امریکی صدر ڈونلڈ ٹرمپ نے کہا ہے کہ ہم آبنائے ہرمز میں ٹول ٹیکس نہیں چاہتے۔

وائٹ ہاؤس میں صحافیوں سے گفتگو کرتے ہوئے امریکی صدر کا کہنا تھا کہ اس وقت ایران سے مذاکرات جاری ہیں۔ انہوں نے کہا کہ ہم صرف یہ چاہتے ہیں کہ ایران کے پاس جوہری ہتھیار نہیں ہونے چاہئیں۔ ایران سے انتہائی افزودہ یورینیم کے ذخیرے کو قبضے میں لےلیں گے۔

ڈونلڈ ٹرمپ کا کہنا تھا کہ امریکی نیوی اچھا کام کر رہی ہے، کوئی بھی بحری جہاز ایران نہیں جا پارہا۔ ناکہ بندی کے ذریعے ہم آبنائے ہرمز کا کنٹرول سنبھالے ہوئے ہیں۔

یو این آئی۔ ع ا۔

واشنگٹن، امریکہ کے بھیجے گئے پیغام نے کسی حد تک اختلافات کم کیے ہیں، لیکن ان اختلافات کو مزید کم کرنے کے لیے واشنگٹن کی جانب سے جنگ کی دھمکیوں کا خاتمہ ضروری ہے۔

امریکی تجاویز پر ایرانی خبر رساں ایجنسی کی رپورٹ کے مطابق ترجمان ایرانی وزارت خارجہ اسماعیل بقائی نے کہا ہے کہ سنجیدگی اور نیک نیتی مگر ٹھوس منطقی شکوک و شبہات کے ساتھ مذاکرات کا رستہ اپنا رہا ہے۔

انہوں نے کہا کہ ایران تمام محاذوں پر جنگ کا خاتمہ، منجمد اثاثوں کا اجرا، ایرانی جہازوں کیخلاف بحری قزاقی کا خاتمہ چاہتا ہے۔ اسماعیل بقائی کا کہنا تھا کہ جوہری معاملات پر قیاس آرائیوں کا حقیقت سے کوئی تعلق نہیں۔ انہوں نے خبردار کیا کہ امریکا کا دھمکی آمیز رویہ غیر موثر رہے گا۔

یو این آئی۔ ع ا۔