سری نگر، جموں و کشمیر کے لیفٹیننٹ گورنر منوج سنہا نے منگل کے روز کہا کہ منشیات سے جڑے دہشت گرد نیٹ ورک کو مکمل طور پر ختم کرنے اور نوجوان نسل کو نشے کی لعنت سے بچانے کے لیے عوام کو منشیات کے غلط استعمال کے خلاف آخری اور فیصلہ کن ضرب لگانی ہوگی۔

پلوامہ میں منشیات مخالف ریلی سے خطاب کرتے ہوئے منوج سنہا نے کہا کہ منشیات کے خلاف جاری مہم اب ایک عوامی تحریک کی شکل اختیار کر چکی ہے اور اس میں معاشرے کے ہر طبقے کی شرکت ضروری ہے۔

لیفٹیننٹ گورنر کے دفتر کی جانب سے سوشل میڈیا پلیٹ فارم ایکس پر جاری ایک پوسٹ میں انہوں نے کہا، میں نے اپنے بھائیوں اور بہنوں سے اپیل کی ہے کہ وہ منشیات کے ناسور کے خلاف آخری وار کریں تاکہ ہم سب مل کر نارکو دہشت گردی کے نیٹ ورک کو تباہ کر سکیں اور اپنی نوجوان نسل کو نشے کی لت سے محفوظ رکھ سکیں۔

انہوں نے مزید کہا کہ گزشتہ ایک ماہ کے دوران جموں و کشمیر میں عوامی بیداری میں نمایاں اضافہ ہوا ہے۔ انہوں نے کہا کہ بارہمولہ میں ہزاروں افراد کو منشیات کے خلاف آواز بلند کرتے دیکھا گیا، جبکہ جموں، سانبہ، ادھم پور، کٹھوعہ، سری نگر اور دیگر اضلاع میں بھی نوجوانوں اور والدین نے اس جدوجہد کے تئیں مضبوط عزم کا مظاہرہ کیا ہے۔

گزشتہ ماہ شروع کیے گئے ’نشہ مکت ابھیان جموں و کشمیر‘ کے تحت چلائی گئی مہم کے دوران جموں و کشمیر پولیس نے نارکوٹک ڈرگس اینڈ سائیکو ٹروپک سبسٹینسز (این ڈی پی ایس) ایکٹ کے تحت 700 سے زائد مقدمات درج کرتے ہوئے 800 سے زیادہ افراد کو گرفتار کیا ہے۔

اس مہم کے دوران 600 کلوگرام سے زائد منشیات بھی ضبط کی گئی ہیں۔

یو این آئی۔ اے ایم۔ایف اے

سری نگر، جموں و کشمیر کرائم برانچ کی اقتصادی جرائم شاخ (ای او ڈبلیو) کشمیر نے منگل کے روز جنوبی کشمیر میں ایک مہاجر کی جائیداد اور کھڑے درختوں کی فروخت سے متعلق 93 لاکھ روپے کے مبینہ زمینی فراڈ معاملے میں ضلع بڈگام میں تلاشی مہم چلائی۔

حکام نے بتایا کہ یہ تلاشی مہم اس سال اپریل میں پولیس اسٹیشن ای او ڈبلیو کشمیر میں بھارتیہ نیائے سنہتہ کی دفعات 318(4)، 336(3)، 340 اور 61(2) کے تحت درج ایف آئی آر کے سلسلے میں انجام دی گئی۔ یہ معاملہ پلوامہ کے دروسو علاقے میں پانچ کنال مہاجر زمین اور بجبہاڑہ میں 300 کھڑے درختوں کی فرضی معاہدوں کے ذریعے مبینہ دھوکہ دہی سے فروخت سے متعلق ہے۔

ملزمان کی شناخت زمین کے دلال غلام محی الدین ڈار (جوالہ پورہ، بڈگام باشندہ) اور سوم ناتھ کول (بنگلور نارتھ، کرناٹک/جنی پور، جموں باشندہ) کے طور پر ہوئی ہے۔

ای او ڈبلیو نے بتایا کہ تحقیقات کے دوران یہ بات سامنے آئی کہ شکایت کنندہ کو مبینہ طور پر مہاجر کی زمین اور درخت خریدنے کے لیے گمراہ کیا گیا تھا، جبکہ کول نے مبینہ طور پر اصل مالکان کے وکیل کے طور پر کام کیا اور ڈار نے گواہ کا کردار ادا کیا۔

ای او ڈبلیو کے مطابق مزید تحقیقات سے معلوم ہوا کہ نہ تو زمین اور نہ ہی درخت ملزمان کی ملکیت تھے اور نہ ہی اصل مالکان نے انہیں فروخت کرنے کی اجازت دی تھی۔

حکام نے بتایا کہ تفتیش کے دوران یہ بھی انکشاف ہوا کہ جس بینک اکاؤنٹ میں رقم منتقل کی گئی تھی، وہ رقم منتقل کیے جانے والے اسی دن صرف شکایت کنندہ کو دھوکہ دینے کی نیت سے کھولا گیا تھا۔

انہوں نے کہا کہ غلام محی الدین ڈار اور سوم ناتھ کول کے مبینہ مجرمانہ افعال بادی النظر میں بھارتیہ نیائے سنہتہ کی دفعات 318(4)، 336(3)، 338، 340 اور 61(2) کے تحت قابل سزا جرم کی نشاندہی کرتے ہیں۔ اسی مناسبت سے مقدمہ درج کرکے تحقیقات شروع کر دی گئی ہیں۔

منگل کے روز ایگزیکٹو مجسٹریٹوں کی موجودگی میں تلاشی کارروائی انجام دی گئی تاکہ معاملے سے متعلق قابل اعتراض مواد اور دیگر شواہد جمع کیے جا سکیں۔

یو این آئی۔ اے ایم

جموں، مرکزی وزیر ڈاکٹر جتیندر سنگھ نے کہا کہ کٹھوعہ- ادھم پور لوک سبھا حلقہ میں گزشتہ ایک دہائی کے دوران ترقی فائلوں سے زمین پر منتقل ہوئی ہے۔

لوک سبھا میں مسلسل تیسری بار اس حلقے کی نمائندگی کرتے ہوئے ڈاکٹر سنگھ نے یو این آئی کے ساتھ ایک خصوصی انٹرویو میں کہا، “اس حلقہ میں ترقی کا انداز، جس میں پانچ اضلاع شامل ہیں: کٹھوعہ، ادھم پور، ڈوڈہ، کشتواڑ اور رام بن، گزشتہ دس برسوں میں مکمل طور پر بدل گیا ہے۔ ہم اب وعدوں سے آگے بڑھ کر ترقیاتی کاموں کی طرف بڑھ چکے ہیں۔”

خطے میں اس تبدیلی اور بنیادی ڈھانچے کی پیش رفت پر بات کرتے ہوئے ڈاکٹر سنگھ نے کہا، “کٹھوعہ-ادھم پور حلقہ یہ ظاہر کرتا ہے کہ کس طرح مضبوط سیاسی عزم، سائنسی طریقے اور بنیادی ڈھانچے میں سرمایہ کاری ایک مشکل جغرافیائی خطے کی تقدیر کو بدل سکتی ہے اور اسے مواقع اور ترقی کے مرکز میں تبدیل کر سکتی ہے۔”

وزیرموصوف نے کہا کہ اس تبدیلی کی سب سے بڑی علامت جموں سری نگر ہائی وے پر ڈاکٹر شیاما پرساد مکھرجی ٹنل ہے جس کا افتتاح وزیر اعظم نریندر مودی نے کیا تھا۔ مزید برآں، آئندہ کٹرہ-دہلی ایکسپریس وے سے سفر کے وقت کو پانچ سے چھ گھنٹے تک کم کرنے کی امید ہے، جبکہ بارڈر روڈز آرگنائزیشن (بی آر او) نے پورے خطے میں 200 سے زیادہ پل تعمیر کیے ہیں۔

مسٹر سنگھ نے کہا کہ ادھم پور میں 190 کروڑ روپے کے دیویکا ریور فرنٹ پروجیکٹ نے مقدس دیویکا ندی کے کناروں کو جدید شہری شکل دی ہے۔ بسوہلی میں دریائے راوی کے اوپر مشہور کیبل سے بنے اٹل سیٹو اور کٹھوعہ میں کڈیان-گنڈیال پل نے اس خطے میں سفر کو بہت سہولت فراہم کی ہے۔

ریلوے کنکٹی وٹی پر بات کرتے ہوئے مسٹر سنگھ نے کہا، “دنیا کے سب سے اونچے ریلوے پل، چناب ریل برج کی تعمیر اور ادھم پور اور کٹھوعہ کے راستے کٹرہ اور دہلی کے درمیان دو وندے بھارت ٹرینوں کے آغاز سے ریل رابطہ نئی بلندیوں پر پہنچ گیا ہے۔”

مزید برآں، مسٹر سنگھ نے کہا کہ ادھم پور ریلوے اسٹیشن کا نام شہید تشار مہاجن کے نام پر رکھا گیا ہے۔ شمالی ہندوستان کا پہلا صنعتی بایو ٹیک پارک کٹھوعہ میں قائم کیا گیا ہے اور سی ایس آئی آر-انڈین انسٹی ٹیوٹ آف انٹیگریٹیو میڈیسن کے ذریعہ قائم کردہ “بایو نیسٹ انکیوبیٹر، گٹھی، کٹھوعہ میں اختراعات کو فروغ دے رہا ہے۔ کٹھوعہ میں “آرکڈ بایو فارما” کا سنگ بنیاد رکھنا عالمی سطح پر فارماسیوٹیکل سیکٹر میں ایک بڑی چھلانگ کی نمائندگی کرتا ہے۔

مرکزی وزیر نےکہاا کہ وزیر اعظم نے اپنے “من کی بات” پروگرام میں خوشبو مشن کے تحت ڈوڈہ میں “جامنی انقلاب” (لیوینڈر کی کاشت) کا بھی ذکر کیا۔ اس مشن نے کسانوں کو سائنس سے جوڑ دیا، جس سے لیوینڈر کی کاشت کے ذریعے مقامی معیشت میں مکمل تبدیلی آئی۔

ڈاکٹر سنگھ نے یہ بھی کہا کہ ادھم پور کے منٹلائی میں بین الاقوامی یوگا سنٹر کی تعمیر، مانسر جھیل کو سودیش درشن اسکیم میں شامل کرنا اور کشتواڑ میں مچیل یاترا میں سہولیات کی بہتری سبھی طبقوں کو ذہن میں رکھتے ہوئے ڈیزائن کیے گئے اقدامات کو ظاہر کرتی ہے۔

وزیر نے کہا، “راشٹریہ اوچتر شکشا ابھیان (آر یو ایس اے) کے تحت پاڈر کے پہاڑی علاقے میں ایک ڈگری کالج کے افتتاح نے اعلیٰ تعلیم کو دور دراز کے علاقوں تک پہنچایا ہے۔ محض ضلع کشتواڑ میں پکل ڈل، کیرو، کوار، دول ہستی اور رتلے ہائیڈرو الیکٹرک پروجیکٹ بجلی کی حفاظت فراہم کریں گے اور روزگار کے نئے مواقع پیدا کریں گے۔”

ڈاکٹر سنگھ نے یہ بھی بتایا کہ صرف پچھلے ایک سال میں خطے میں 21 بڑے منصوبے مکمل کیے گئے ہیں۔ ان میں ڈوڈہ، کشتواڑ اور ادھم پور کے لیے نیشنل ہائی وے 244 کے تحت منظور شدہ تقریباً 9,800 کروڑ روپے کے سرنگ پروجیکٹ شامل ہیں۔ چترگلا ٹنل، ادھم پور ہوائی اڈے کا آپریشنلائزیشن اور کشتواڑ کو اڑان اسکیم میں شامل کرنا یہ ظاہر کرتا ہے کہ فضائی خدمات اب پہاڑی علاقوں تک پہنچ رہی ہیں۔

ڈاکٹر سنگھ نے کہا کہ گزشتہ سال کے بادل پھٹنے کے سانحے کے بعد حساس علاقوں جیسے مچیل اور پیڈر میں حفاظتی اقدامات کیے گئے ہیں۔ یہاں زلزلہ آبزرویٹری میں خودکار موسمی اسٹیشن نصب کیے گئے ہیں، اور ڈوڈہ کے لیے ایک ڈوپلر ویدر رڈار تجویز کیا گیا ہے۔

سڑک کنیکٹی وٹی پر وزیر نے کہا، “1000 کروڑ روپے سے زیادہ کے پردھان منتری گرام سڑک یوجنا کے پروجیکٹوں کا افتتاح یا آغاز کیا گیا ہے۔ مزید برآں، ہیراگر کے سیلاب سے متاثرہ سرحدی دیہاتوں کے لیے ایک نینو ٹیکنالوجی پر مبنی واٹر فلٹریشن پلانٹ یہ ظاہر کرتا ہے کہ جدید ٹیکنالوجی اب آخری میل تک پہنچ رہی ہے۔”

ڈاکٹر سنگھ نے نوٹ کیا کہ کٹھوعہ-ادھم پور پارلیمانی حلقہ میں گزشتہ ایک سال کے دوران کئی اہم پیش رفت ہوئی ہے۔ ان میں ممبر آف پارلیمنٹ (ایم پی ایل اے ڈی) کے فنڈز سے آئی سی یو ایمبولینس، پینے کے پانی کے لیے ہینڈ پمپ، ڈوڈہ میں کھیل کے میدانوں میں سولر لائٹس، کٹھوعہ شہر میں ایک کثیر المنزلہ پارکنگ کمپلیکس، شہید نائک وکیل سنگھ جسروٹیا کے نام سے منسوب لڑکیوں کا اسکول، بلاور میں منصف کورٹ، اور رام کوٹ میں ایک کیندریہ ودیالیہ شامل ہیں۔

وزیر نے کہا، “اس خطے کی ترقی عوام کو ذہن میں رکھ کر کی جا رہی ہے تاکہ ڈوڈہ یا کشتواڑ کے سب سے دور دراز گاؤں بھی ملک کی ترقی کی کہانی سے جڑے ہوئے محسوس کر سکیں۔”

مسٹر سنگھ نے مزید کہا، “وزیر اعظم نے واضح طور پر کہا ہے کہ تمام سرکاری اسکیموں اور ترقیاتی کاموں کے فائدے قطار میں کھڑے آخری شخص تک پہنچنے چاہئیں اور اس ویژن کے ساتھ ہم اس خطے کو مزید مضبوط اور مستقبل میں ایک ماڈل حلقہ بنانے کے لیے کام کر رہے ہیں۔”

یو این آئی۔ ظ ا۔ م الف