سرینگر، ہندوستانی فوج کی شمالی کمان کے کمانڈر لیفٹیننٹ جنرل پرتیک شرما نے آج شمالی کشمیر میں لائن آف کنٹرول کے اگلے مورچوں کا دورہ کیا۔ اس دورے کا مقصد موسم گرما کے لیے آپریشنل حکمت عملی اور خطے میں فوج کی مجموعی تیاریوں کا معائنہ کرنا تھا۔لائن آف کنٹرول پر تعینات دستوں سے بات چیت کرتے ہوئے لیفٹیننٹ جنرل شرما نے ان کے غیر متزلزل جذبے، آپریشنل مہارت اور ملک کے لیے ان کی انتھک وابستگی کو سراہا۔

شمالی کمان نے سوشل میڈیا پر اپنے پیغام میں بتایا کہ آرمی کمانڈر نے تمام رینک کے اہلکاروں پر زور دیا کہ وہ اپنی آپریشنل صلاحیتوں میں مہارت حاصل کریں اور ہر وقت چوکنا، مستعد اور کسی بھی چیلنج کے لیے تیار رہیں۔سیکیورٹی حکام کے مطابق، شمالی کشمیر کے بالائی علاقوں میں برف پگھلنے کے ساتھ ہی سرحد پار سے دراندازی کے خطرات بڑھ جاتے ہیں۔

موسم گرما کے روایتی خطرات کے پیش نظر فوج نے سرحد پر نگرانی کا نظام مزید سخت کر دیا ہے۔

وہ علاقے جو شدید برف باری کے باعث سردیوں میں کٹ کر رہ جاتے ہیں، اب دوبارہ قابلِ رسائی ہو گئے ہیں۔ اسی لیے سیکورٹی فورسز نے دراندازی روکنے کے اقدامات کو مضبوط کیا ہے اور سرحد پر فوج کی تعیناتی کے پیٹرن کا ازسرِ نو جائزہ لیا ہے۔یہ دورہ اس بات کی عکاسی کرتا ہے کہ ہندوستانی فوج سرحدوں پر کسی بھی قسم کی دراندازی کی کوشش کو ناکام بنانے کے لیے پوری طرح متحرک اور مستعد ہے۔

یواین آئی ۔م اع

سرینگر، جموں و کشمیر اور لداخ کے خطوں میں موسمیاتی تبدیلیاں اور بارشوں کی مسلسل کمی ایک سنگین صورتحال اختیار کر رہی ہے۔ محکمہ موسمیات کے جاری کردہ تازہ ترین اعداد و شمار کے مطابق، یکم مارچ سے 13 مئی کے درمیان اس خطے میں معمول سے 26 فیصد کم بارش ریکارڈ کی گئی ہے، جو زراعت اور پانی کے ذخائر کے لیے خطرے کی گھنٹی ہے۔ماہرینِ موسمیات کا کہنا ہے کہ یہ کمی کسی وقتی تبدیلی کا نتیجہ نہیں بلکہ ایک طویل مدتی تشویشناک رجحان کا حصہ ہے۔

گزشتہ سال نومبر سے شروع ہونے والا خشک سالی کا یہ سلسلہ اب ساتویں مسلسل مہینے میں داخل ہو چکا ہے۔یکم مارچ سے اب تک خطے میں صرف 196.9 ملی میٹر بارش ہوئی ہے، جبکہ اس دوران معمول کی بارش 266.1 ملی میٹر ہونی چاہیے تھی۔

رپورٹ کے مطابق کشمیر اور جموں کے کئی اضلاع بارش کی شدید قلت کا شکار ہیں۔جنوبی کشمیر کا ضلع شوپیاں 72 فیصد کمی کے ساتھ سب سے زیادہ متاثرہ علاقہ رہا (شدید قلت کا حامل)۔دیگر متاثرہ اضلاع جیسے کٹھوعہ (58٪)، کلگام (54٪)، اننت ناگ (47٪)، بڈگام (43٪) اور کشتواڑ (36٪) میں بھی بارشیں معمول سے کافی کم رہیں۔

یو این آئی م اع

کواڑہ، جموں و کشمیر کے لیفٹیننٹ گورنر منوج سنہا نے بدھ کے روز ضلع کپواڑہ میں ایک عوامی ‘پدیاترا’ (پیدل مارچ) سے خطاب کرتے ہوئے اعلان کیا کہ یونین ٹیریٹری میں جاری ‘ڈرگ فری جموں کشمیر مہم’ نے منشیات کے نیٹ ورک کی کمر توڑ دی ہے۔ انہوں نے بتایا کہ گزشتہ محض 32 دنوں کے دوران 730 سے زائد منشیات فروشوں اور اسمگلروں کو گرفتار کیا گیا ہے۔ایل جی منوج سنہا نے اپنے خطاب میں مہم کی پیش رفت پر روشنی ڈالتے ہوئے کہا کہ منشیات کے خلاف شروع کی گئی یہ مہم اب ایک عوامی تحریک کی شکل اختیار کر چکی ہے اور منشیات کے خاتمے کے لیے ایک “انقلاب” میں بدل رہی ہے۔

ایل جی کے مطابق، انتظامیہ کی مسلسل کارروائیوں نے منشیات اور دہشت گردی کے باہمی گٹھ جوڑ کو مفلوج کر دیا ہے۔ مہم کے دوران اسمگلروں کی کروڑوں روپے مالیت کی جائیدادیں اور اثاثے ضبط کیے گئے ہیں۔ سرحد پار سے منشیات کے رابطوں کو توڑنے کے لیے 15 مبینہ اسمگلروں کے پاسپورٹ منسوخ کرنے کی سفارش کی گئی ہے تاکہ ان کی نقل و حرکت کو محدود کیا جا سکے۔ضلع کپواڑہ میں منعقدہ اس ‘پدیاترا’ میں سرکاری افسران، طلبہ، سول سوسائٹی کے ارکان اور مقامی باشندوں نے بڑی تعداد میں شرکت کی۔ شرکاء نے معاشرے کو منشیات کی لعنت سے پاک کرنے کا پختہ عہد کیا۔

یاد رہے کہ ایل جی منوج سنہا نے گزشتہ ماہ ‘نشہ مکت ابھیان’ کا آغاز کیا تھا، جس کے بعد سے وہ خود اس مہم کو تقویت دینے کے لیے یونین ٹیریٹری کے مختلف علاقوں کا دورہ کر رہے ہیں تاکہ نوجوانوں کو اس وباء سے بچایا جا سکے۔

یواین آئی ۔م اع