ہوانا، کیوبا کے وزیرِ خارجہ برونو روڈریگز نے امریکی وزیرِ خارجہ مارکو روبیو پر سخت تنقید کرتے ہوئے الزام عائد کیا ہے کہ وہ جھوٹے بیانات کے ذریعے خطے میں فوجی کشیدگی اور تصادم کو ہوا دے رہے ہیں۔

برونو روڈریگز نے کہا کہ مارکو روبیو ایک بار پھر کیوبا پر دہشت گردی کی سرپرستی کرنے والی ریاست ہونے کا بے بنیاد الزام لگا رہے ہیں تاکہ خطے میں تناؤ کو مزید بڑھایا جا سکے۔

انہوں نے الزام عائد کیا کہ امریکی وزیرِ خارجہ مسلسل ایسے بیانات دے رہے ہیں جو فوجی جارحیت اور تصادم کی راہ ہموار کر سکتے ہیں، جس کے نتائج امریکہ اور کیوبا دونوں کے لیے خونریزی کی صورت میں سامنے آ سکتے ہیں۔

کیوبا کے وزیرِ خارجہ کے مطابق کیوبا سے امریکی سلامتی کو کسی قسم کا خطرہ لاحق نہیں، تاہم واشنگٹن دانستہ طور پر جزیرے میں معاشی بحران اور سماجی بے چینی کو بڑھانے کی کوشش کر رہا ہے۔

انہوں نے امریکہ پر الزام لگایا کہ پابندیوں، سیاسی دباؤ اور معاشی اقدامات کے ذریعے کیوبا کو غیر مستحکم کرنے کی پالیسی اپنائی جا رہی ہے۔

برونو روڈریگز نے کہا کہ اس کے برعکس کیوبا خطے میں امن، استحکام اور باہمی احترام پر مبنی تعلقات کا خواہاں ہے۔

یواین آئی۔ م س

واشنگٹن، امریکی صدر ڈونلڈ ٹرمپ نے کہا ہے کہ ایران کے ساتھ مذاکرات اب بھی جاری ہیں، تاہم امریکہ کسی بھی ممکنہ معاہدے میں تہران کو جوہری ہتھیار حاصل کرنے کی اجازت نہیں دے گا۔ انہوں نے دعویٰ کیا کہ ایران کے ساتھ جاری تنازع بہت جلد اپنے اختتام کو پہنچ جائے گا۔

وائٹ ہاؤس میں صحافیوں سے گفتگو کرتے ہوئے صدر ٹرمپ نے کہا کہ امریکہ جو چاہتا ہے وہ کسی نہ کسی طریقے سے حاصل کر کے رہے گا۔

انہوں نے کہا کہ واشنگٹن تہران پر شدید دباؤ برقرار رکھے ہوئے ہے اور امریکی بحریہ ایران کے خلاف سخت ناکہ بندی جاری رکھے ہوئے ہے۔

ٹرمپ کے مطابق امریکہ نے فولادی محاصرے کے ذریعے آبنائے ہرمز پر مؤثر کنٹرول حاصل کر لیا ہے۔

امریکی صدر نے واضح کیا کہ واشنگٹن نہیں چاہتا کہ افزودہ یورینیم ایران کے اندر موجود رہے اور امریکہ ایرانی افزودہ یورینیم کے ذخائر کو حاصل کرنے کے بعد انہیں تباہ کرنے پر کام کرے گا۔

سمندری تجارت سے متعلق گفتگو میں ٹرمپ نے زور دیا کہ آبنائے ہرمز کو بین الاقوامی جہاز رانی کے لیے بغیر کسی ٹیکس یا پابندی کے کھلا رہنا چاہیے۔

یہ بیانات ایسے وقت سامنے آئے ہیں جب ایران کے جوہری معاملے پر سفارتی سرگرمیاں جاری ہیں۔

اس سے قبل امریکی وزیر خارجہ مارکوروبیو نے امید ظاہر کی تھی کہ پاکستان کی ثالثی امریکہ اور ایران کے درمیان جنگ کے خاتمے کے لیے کسی معاہدے تک پہنچنے میں مددگار ثابت ہو سکتی ہے۔

مارکو روبیو نے کہا کہ پاکستانی حکام آج تہران جا رہے ہیں اور انہیں امید ہے کہ اس سے مذاکراتی عمل آگے بڑھے گا۔

رپورٹس کے مطابق تہران پاکستانی آرمی چیف جنرل عاصم منیر کے ممکنہ دورے کا منتظر ہے، جو اسلام آباد کی جانب سے جاری ثالثی کوششوں کا حصہ سمجھا جا رہا ہے۔

یاد رہے کہ تہران 28 فروری کو شروع ہونے والی جنگ کے خاتمے کے لیے امریکہ کی جانب سے پیش کی گئی ایک تجویز پر غور کر رہا ہے۔

یواین آئی۔ م س

واشنگٹن، امریکہ نے ایسے 9 افراد پر نئی پابندیاں عائد کرنے کا اعلان کیا ہے جن پر حزب اللّٰہ کے لیے لبنان کی خودمختاری کو نقصان پہنچانے اور تنظیم کے سیاسی و مالیاتی نیٹ ورک کو مضبوط بنانے میں مدد دینے کا الزام عائد کیا گیا ہے۔ امریکی حکام کے مطابق یہ اقدامات حزب اللّٰہ کو غیر مسلح کرنے اور لبنان میں حکومتی عمل داری مضبوط بنانے کی کوششوں کا حصہ ہیں۔

امریکی وزارتِ خزانہ کے ترجمان ٹومی پیگوٹ نے کہا کہ حزب اللّٰہ کی حمایت کے ذریعے یہ افراد لبنان میں ایرانی حکومت کے ’’بدنیتی پر مبنی ایجنڈے‘‘ کو آگے بڑھا رہے ہیں اور لبنانی عوام کے لیے امن و استحکام کی راہ میں رکاوٹ بن رہے ہیں۔

انہوں نے کہا کہ حزب اللّٰہ کی جانب سے دہشت گردی کی مسلسل حمایت اور ہتھیار ڈالنے سے انکار لبنان کو امن، استحکام اور خوشحالی کی جانب بڑھنے سے روک رہا ہے۔

ٹومی پیگوٹ کے مطابق پابندیوں کی زد میں آنے والوں میں پارلیمنٹ کے ارکان، ایک سابق ایرانی سفارت کار اور ایسے سکیورٹی اہلکار شامل ہیں جن پر حزب اللّٰہ کے مفاد میں اپنے اختیارات استعمال کرنے کا الزام ہے۔

امریکی حکام نے یہ بھی اعلان کیا کہ محکمہ خارجہ کے ’’انعام برائے انصاف‘‘ پروگرام کے تحت ایسے افراد کو 10 ملین ڈالر تک انعام دیا جائے گا جو حزب اللّٰہ کے مالیاتی نیٹ ورک سے متعلق معلومات فراہم کریں۔

ٹومی پیگوٹ نے خبردار کیا کہ جو عناصر حزب اللّٰہ کو پناہ، تعاون یا کسی بھی شکل میں مدد فراہم کرتے رہیں گے، انہیں جواب دہ ہونا پڑے گا۔

انہوں نے زور دیا کہ ایک محفوظ اور مستحکم لبنان کے لیے حزب اللّٰہ کا مکمل غیر مسلح ہونا اور ملک بھر میں سکیورٹی امور پر لبنانی حکومت کی مکمل عمل داری ضروری ہے۔

امریکی پابندیوں کی نئی فہرست میں ابراہیم الموسوی، حسن فضل اللہ، حسین الحاج حسن، محمد عبد المطلب فنیش، احمد اسعد بعلبکی، سامر عدنان حمادی، خضر ناصر الدین، علی احمد صفاوی اور محمد رضا رؤف شیبانی کے نام شامل ہیں۔

دوسری جانب واشنگٹن میں لبنان اور اسرائیل کے درمیان براہِ راست مذاکرات کے تیسرے دور کے بعد امریکہ نے جنگ بندی میں توسیع کا اعلان کیا ہے۔

امریکی وزارتِ خارجہ کے مطابق مذاکرات کا نیا دور 2 اور 3 جون کو منعقد ہوگا، جبکہ اس سے قبل 29 مئی کو پینٹاگون لبنان اور اسرائیل کے فوجی وفود کے درمیان ایک اجلاس کی میزبانی کرے گا۔

ادھر حزب اللّٰہ نے لبنان اور اسرائیل کے درمیان براہِ راست مذاکرات کو مسترد کر دیا ہے، خاص طور پر ایسے مذاکرات کو جو اس کے ہتھیار ڈالنے کے معاملے سے متعلق ہوں۔

واضح رہے کہ 17 اپریل کو اعلان کردہ جنگ بندی میں مزید 45 دن کی توسیع حال ہی میں نافذ ہوئی ہے، تاہم اس کے باوجود اسرائیلی حملے اور جنوبی لبنان میں کشیدگی کا سلسلہ جاری ہے۔

یواین آئی۔ م س